Qytaıda Aqjarqyn Turlybaı sııaqty ustalǵan bir azamat atý jazasyna kesildi - elshi Nuryshev
ASTANA. QazAqparat - Búgin syrtqy ister mınıstrliginde ótken baspasóz máslıxatynda Qazaqstannyń Qytaıdaǵy Tótenshe jáne Ókiletti elshisi Shaxrat Nuryshev sol jaqta sottalǵan qazaqstandyqtardy qaıtarý jumysy boıynsha baıandap, Aqjarqyn Turlybaıdyń kezekti sotyna toqtaldy.
Onyń sózine qaraǵanda, Qytaıda osy ispetti qylmys úshin sottalǵan bir shetel azamatyn atý jazasyna kesti. Qazaqstan ondaı jazaǵa jol bermeýge tyrysady, dep xabarlaıdy QazAqparat tilshisi.
Elshiniń aıtýynsha, ótken jyly eki eldi arasynda sottalǵan azamattardy qaıtarý boıynsha arnaıy xattamaǵa qol qoıylǵan bolatyn. Sonyń negizinde tamyz aıynan bastap Qytaıda sottalǵan 12 Qazaqstan azamaty elge qaıtarylyp, jazalaryn óz jerinde ótep júr. "Dál qazir taǵy 12 adamdy qaıtarý boıynsha tıisti sharalar atqarylyp jatyr. Olar san alýan qylmystar úshin sottalǵan. Іshinde ómir baqı bas bostandyǵynan aıyrylǵandar bar. Budan bólek, úsh qazaqstandyqtyń jazany óteý merzimi 2016-2017 jyldary aıaqtalady. Sondaı-aq úsh adam sottyń sheshimin oqshaýlaǵyshta kútip júr. Olardyń ishinde esirtki saýdasyna qatysy bar degen kúdikpen ustalǵan Aqjarqyn Turlybaı da bar", - dedi Sh.Nuryshev.
Elshiniń sózine qaraǵanda, erteń, qarashanyń 2-si kúni A.Turlybaı boıynsha kezekti ret sot otyrysy ótedi. "Aqjarqyn Turlybaı boıynsha bir ret sot sheshiminiń shyqqanyn jaqsy bilemiz. Sol kezde ony ómir baqı qytaıdyń túrmesine otyrǵyzý sheshimi shyǵarylǵan bolatyn. Biraq syrtqy ister mınıstrliginiń jumysy bar, bas prokýratýranyń jumysy bar, elshiliktiń jumysy arqasynda biz sol sot sheshimin qaıta qaraýǵa qol jetkizdik. Týra sondaı qylmys úshin jaqynda ǵana bizdiń kórshiles bir memlekettiń azamatyn ólim jazasyna kesken bolatyn. Ol kisi atylyp ketti...Sondyqtan biz óz tarapymyzdan bar kúsh-jigerimizdi salyp, bizdiń árbir azamatymyz úshin, onyń taǵdyry úshin, ómiri úshin kúshimizdi aıamaı, eńbektenip, olardy Qazaqstanǵa qaıtarýǵa bar kúshimizdi salýdamyz", - dep atap kórsetti Sh.Nuryshev.
