Qytaıda adamnyń bet-álpetin tanıtyn bankomat jasaldy
ASTANA. QazAqparat - Qytaı adamdy júzinen taný tehnologııasyna ıe álemdegi eń alǵashqy bankomatty qurastyrdy. Eger qyzmetti qoldanýshynyń kelbeti tirkelgen nesıe kartasynyń ıesimen sáıkes kelmese, bankomat aqsha bermeıdi. Hanchjoý qalasyndaǵy Tzekwan tehnologııalyq kompanııasy men Tsınhýa ýnıversıtetiniń mamandary birige jasaǵan bankomat bıometrlik úlgige ıe boldy, dep jazady qytaılyq Sınhýa aqparattyq agenttigi.
Bıometrlik bankomattyń aldyna ornatylǵan kamera qoldanýshynyń betin sýretke alyp, ózinde bar málimetpen salystyrady. Qurastyrýshylardyń aıtýynsha, jańa júıe adamnyń bıologııalyq erekshelikterin de ańǵara alady. Sondyqtan adamnyń túriniń ár túrli sebeppen ózgeriske ushyraýy eshqandaı qıyndyq týdyrmaıdy eken.
Tzekwan kompanııasynyń bas dırektory Gý Tszıkýn (Gu Zikun) bank qyzmetin kórsetýdiń jańa úlgisi jýyrda naryqqa shyǵatynyn habarlady. Al apparattyń jumys isteý algorıtmi týraly ázirge eshteńe aıtylmady.
Gýdyń aıtýynsha, adamnyń beınesin tanı alatyn ATM-bankomattar qarjy qylmysyna qarsy kúrestiń kúsheıýine aıtarlyqtaı septigin tıgizedi. Sonymen qatar, bankomat qaýipsizdikti tolyǵymen qamtamasyz etý maqsatynda ózi bergen aqshanyń serııalyq nómirlerin saqtap otyrady.
Resmı aqparatqa oraı, jańa júıemen jabdyqtalatyn qyzmet úlgisi búginde qoldanylyp júrgen bankomattarǵa qaraǵanda 20%-ǵa utymdy jumys isteıtin bolady, dep jazady massaget.kz.
