Qytaıda 4 sáýir koronavırýs qurbandaryn aza tutý kúni bolyp jarııalandy

BEIJІŃ. QazAqparat – Qytaıda 4 sáýir jańa koronavırýs ınfektsııasy pandemııasynan kóz jumǵandardy jalpyulttyq aza tutý kúni bolyp jarııalandy. Mundaı sheshimdi QHR Memlekettik keńesi qabyldady, dep habarlaıdy QazAqparat «Sınhýa» agenttigine silteme jasap.

Senbi kúni jergilikti ýaqyt boıysha saǵat 10:00-den bastap úsh mınýt boıy Qytaı halqy qaıtys bolǵandardy únsizdikpen eske alady. Elde barlyq týlar tómen túsirilip, qoǵamdyq kóńil kóterý sharalary toqtatylady. Sondaı-aq avtokólikter, poıyzdar men kemelerdiń dybys belgilerin beredi, sırenanyń daýsy estilip turady.

Ótken táýlikte Qytaıdyń qurlyqtaǵy bóliginde 4 adam koronavırýstan kóz jumdy, aýrý juqtyrǵandar sany 31 adamǵa artqan, taǵy 163 adam emdelip shyqty, dep habarlady QHR Densaýlyq saqtaý isteri jónindegi memlekettik komıteti.

Buǵan deıin habarlaǵandaı, 1 sáýirden bastap Qytaıdyń medıtsına bıligi eldegi koronavırýstyq jaǵdaıdyń kúndelikti bıýlletenine aýrý belgileri joq ınfektsııalar engize bastady.

«2020 jylǵy 2 sáýirdegi jaǵdaı boıynsha Qytaıdyń qurlyqtaǵy bóliginde koronavırýstyń 60 aýrý belgileri joq jańa jaǵdaıy tirkelgen, onyń ishinde 7-ýi syrttan ákelingen. Qazirgi ýaqytta medıtsınalyq baqylaýda 1027 aýrý sımptomdary joq naýqas bar», - delingen juma kúni jarııalanǵan vedomstvo bıýlleteninde.

Sońǵy resıı derekter boıynsha, qurlyqtyq Qytaıda koronavırýs juqtyrǵandardyń jalpy sany 81, 6 myń adamǵa jetti, olardyń 76,5 myńy saýyǵyp shyqsa, 3322-si kóz jumǵan.