Qytaıda 343 qazaqstandyq óz erkimen qaldy - QR SІM
Bul týraly QR Syrtqy ister mınıstri Muhtar Tileýberdi QR Parlamenti Májilisinde aıtty.
«10 aqpanda 217 azamatymyz elge jetkizilgen edi. Taǵy bir ushaǵymyz búgin keshke Qytaıǵa ushyp, taierteń 155 qazaqstandyqty Almatyǵa jetkizedi. Osy reısten keıin Qytaıda 343 azamatymyz óz erkimen qalady, olar dıplomatııalyq mekemelerdiń qyzmetkerleri jáne olardyń otbasy músheleri. Sonymen birge, stýdentter men óz sharýalarymen barǵan azamattar da bar. Olarmen bizdiń elshilik sóılesti, olar qaıtýǵa nıet bildirmedi», - dedi M. Tileýberdi.
Onyń aıtýynsha, Qazaqstannyń Qytaıdaǵy barlyq dıplomatııalyq mekemeleri qalypty rejımde jumys istep tur. Tek konsýldyq bólimshelerdiń jumysyna shekteý qoıylǵan.
Sonymen birge, mınıstr búgin keshke Qytaıǵa jiberiletin ushaqta 220 oryn bar ekenin aıtty. Sondyqtan, 155 jolaýshyǵa qosymsha elge qaıtýǵa sheshim qabyldaǵan azamattardy da ala ketýge bolady. Olar úshin 65 oryn bos.
«Charterlik reısti QR Úkimeti uıymdastyrǵan. Barlyq jolaýshylar tegin jetkiziledi. «Eır Astana» kompanııasynyń ushaǵy Almaty qalasyna ushyp keledi jáne jolaýshylar eki aptalyq karantınge ázirlengen arnaıy korpýsqa jatqyzylady. Nur-Sultandaǵy mundaı karantındik oryndarda adam sany tolyq», - dedi mınıstr.
