Qytaıda 3000 jyl burynǵy qabirler tabyldy

SININ. QazAqparat – Dúısenbide arheologtar Qytaıdyń soltústik-batysyndaǵy Tsınhaı provıntsııasyndaǵy ústirtte 3000 jyl burynǵy qırandylardyń arasynan 3 228 qabir tapty. Dýlan okrýgindegi Balong kentinde ornalasqan qırandy bizdiń dáýirimizge deıingi 1500-1000 jyldar aralyǵyndaǵy qabirler men turǵyn úılerdi biriktiretin top bolyp sanalady. Bul týraly QazAqparat Xinhua-ǵa silteme jasap habarlaıdy.

Provıntsııanyń Mádenı mura jáne arheologııa ǵylymı-zertteý akademııasy men Qytaıdyń Soltústik-Batys ýnıversıteti 2021 jyly birlesken qazba jumystaryn bastaǵan. Arheologııalyq qazba jobasynyń jetekshisi Dý Veı (Du Wei) qazirgi ýaqytta jalpy aýdany 120 000 sharshy metr bolatyn úsh jerleý orny tabylǵanyn jáne 52 qabir qazylǵanyn habarlady. Dý Veıdiń aıtýynsha, tabylǵan zattardyń arasynda qysh ydystar, qola, nefrıt, mata, adam qaldyqtary, janýarlardyń súıekteri men ósimdik qaldyqtary bolǵan.

Kóptegen jádiger Nýomýhon (Nuomuhong) mádenıetin zertteýge kómektesedi. Nýomýhon mádenıeti – qola dáýirindegi arheologııalyq mádenıet, negizinen Kaıdam basseıninde jáne oǵan jaqyn aýdandarda keń taralǵan.