Qytaıda 2 jylda tyıym salynǵan dinı sektalardyń 1500 múshesi tutqyndaldy
BEIJІŃ. QazAqparat - Qytaıda eki jyldyń ishinde elde tyıym salynǵan dinı sektalardyń 1500-deı músheleri tutqyndaldy, dep habarlady seısenbi kúni qytaı polıtsııasynyń ókilderi.
Qytaıdyń soltústik-batysyndaǵy musylmandar basym turatyn Nınsıa-Hýeı avtonomııalyq ólkesinde 2012 jyldan beri «Qudyretti qudaı» sektasynyń 800 múshesi jáne tyıym salynǵan «Disciples Sect» sektasynyń 580 jamaǵaty tutqyndalǵan. Dinı sektalardyń 1200-den astam múshesi ákimshilik jaýapkershilikke tartylyp, 87 múshesine aıyptaý taǵylǵan, 59-y - túrmege otyrǵyzylǵan.
Soltústikqytaılyq Lıaonın provıntsııasynda 2013 jyldan beri «Qudyretti qudaı» sektasynyń 113 jamaǵaty tutqyndalyp, olardyń 20-sy túrmege jabylǵan.
Eske sala keteıik, 2014 jylǵy mamyrdaǵy «Qudyretti qudaı» sektasynyń qyzmetimen baılanysty qaıǵyly oqıǵa qytaı qoǵamyn dúr silkindirdi. Osy sektanyń jaqtaýshylary Shandýn provıntsııasyndaǵy «Makdonalds» meıramhanalarynyń birinde jurttyń kózinshe áıel adamdy óltirgen. Oǵan qurban bolǵan áıeldiń «Qudyretti qudaı» sektasy múshelerine óziniń baılanys málimetterin berýden jáne osy atalǵan dinı qoǵamǵa kirýden bas tartýy sebep bolǵan.
Qytaıda «Qudyretti qudaı» sektasy 90-shy jyldardyń basynan paıda bolǵan, onyń negizin qalaýshy - Chjao Veıshen. Sekta jamaǵattary Qytaıda «aqyrzaman» týraly sybys taratqan. 1998 jyldyń kúzinde jergilikti halyqty tonap, zombylyq kórsetken. 2000 jyly sektanyń negizin qalaýshy Chjao Veıshen AQSh-qa ketip, saıası baspana aldy. Keıinnen ol AQSh-ta sektanyń shtab-páterin ashty.
