Qytaı jýrnalısteri Ońtústik Qazaqstan oblysyna qyzyǵyp otyr
ShYMKENT. QazAqparat - Halyqaralyq «EKSPO-2017» kórmesi aıasynda Ońtústik Qazaqstan oblysyna alǵashqy týrıster de kelip jetti. Qytaı eliniń ókilderdi ózderin Qazaqstannyń ońtústigi qyzyqtyrynyn málimdedi. Sondyqtan jospardan tys saıahat jasaýdy jón dep sheshken, dep habarlaıdy QazAqparat HAA tilshisi.
3 kisilik delegatsııany Qytaıdyń ortalyq SSTV telearnasynyń bas prodıýseri Joý Hýń bastap keldi. Bul azamat Astanaǵa deıin Shanhaı men Mılanda ótken EKSPO-ǵa arnaıy habar daıyndaǵan. Bul joly Qazaqstandaǵy EKSPO-nyń ótýin baqylaýǵa arnaıy at basyn burypty. Kúngeıge kelgen qonaqtardy oblystyq týrızm basqarmasynyń basshysy Batyrhan Qurmanseıit kútip aldy. Basqarma basshysy qytaılyqtardy týrıstik áleýeti zor aımaqtarǵa saıahat jasaýǵa shaqyrdy. Al, ońtústikke kelgen qonaqtar óńirimizdiń týrıstik áleýeti ǵana emes, ekonomıkalyq damýy jóninde de bilgisi keletinin jetkizdi.
Aıta keteıik, Joý Hýń eńbek etetin áıgili SSTV telearnasy álemniń 121 elinen habar taratady. 1,5 mıllıard Qytaı eli bul arnany túgel kóredi. Sondyqtan qonaqtar Qazaqstan jaıly derekti fılm túsirýdi kózdep otyr.
«Bıyl Qytaı men Qazaqstan arasyndaǵy dostyqqa 25 jyl tolyp otyr. Sondyqtan bul jyldy «Qazaqstan men Qytaıdyń týrızm jyly» dep aıtýǵa bolady. Osy sátti paıdalana otyryp, biz Qazaqstandy budan ary qaraı tanýǵa kelip otyrmyz. Árıne, onyń ishinde Shymkenttiń alar orny erekshe»,-dedi SSTV telearnasynyń bas prodıýseri Joý Hýń.
Qytaılyqtar tarapynan túsiriletin týyndylar kórshi eldiń azamattary úshin qazaq elin tanyp, bilýge múmkindik bermek. Ári kórermender tarapynan tegin jarnamaǵa qyzyǵýshylyq molaısa, ońtústikke qytaılyq týrıster kóbirek kelýi múmkin.
