Qytaı jastary ıeroglıfterdi umyta bastady
BEIJІŃ. Tamyzdyń 14-i. QazAqparat /Rýslan Súleımenov/ - Búgin Qytaı jastarynyń eleýli bóligi ózara kompıýter men uıaly telefonnyń kómegimen qarym-qatynas jasaýda. Bul óz kezeginde túrli kútpegen jaǵymsyz zardaptarǵa ákelýde. Sonyń biri - jastar ıeroglıfterdi jazýdy umyta bastady.
«Jenmın Jıbao» basylymynyń habarlaýynsha, ústimizdegi jyldyń sáýirinde «Qytaı jastary» gazeti zertteý jumystaryn júrgizdi. Onyń barysynda suraý salynǵan 2 072 adamnyń 83 paıyzy ıeoroglıfterdi jazýǵa qınalatynyn aıtty. Al kelesi bir zertteýdiń nátıjesi suhbat berýshilerdiń 80 paıyzynyń keıbiri ıeroglıfterdiń jazylý tártibin esten shyǵarǵanyn kórsetti. Kóp adamdarǵa ıeroglıfter jazýdyń qajettiligi de joq eken.
Mamandardyń pikirinshe, jastardyń ıeroglıfterdi jaza almaýynyń basty sebebi, telefon arqyly SMS jiberýdiń saldary: qytaılyqtar álemniń ózge halyqtaryna qaraǵanda eń kóp SMS jazatyn halyq. SMS-ter transkrıptsııalyq júıe arqyly jazylyp, ıeroglıfterdiń kúrdeli jazylýyn almastyrady.
