Qytaı Japonııadan teńiz ónimderin ımporttaýdy toqtatty

PEKIN. QazAqparat – 24 tamyzdan bastap Qytaı «Fýkýsıma-1» AES sýynyń muhıtqa aǵyzyla bastaýyna baılanysty Japonııadan teńiz ónimderin ımporttaýdy toqtatty. Bul týraly beısenbi kúni Qytaı Halyq Respýblıkasynyń Bas keden basqarmasy málimdedi, dep habarlaıdy QazAqparat.

Agenttik málimdemesinde qytaılyq tutynýshylardyń densaýlyǵyn saqtaý jáne ımporttalatyn azyq-túlik qaýipsizdigin qamtamasyz etý úshin Bas keden basqarmasy 24 tamyzdan bastap Japonııadan shyqqan teńiz ónimderiniń ımportyn toqtatatyny aıtylǵan.

Japonııa 24 tamyzdan bastap «Fýkýsıma-1» atom elektr stantsııasynan sý aǵyza bastady.

2011 jyly 11 naýryzda teńizde bolǵan magnıtýdasy 9,0 bolatyn joıqyn jer silkinisi nátıjesinde Japonııanyń shyǵys jaǵalaýynda qýatty tsýnamı bolǵan edi. Jer silkinisi men tsýnamı 20 myńǵa jýyq adamnyń ómirin qıdy. Tabıǵı apat Fýkýsıma atom elektr stantsııasyndaǵy apatqa da sebep boldy.