Qytaı zańsyz kóshi-qonǵa qarsy kúresti kúsheıtip jatyr
BEIJІŃ. 23 shilde. QazAqparat - Qyrkúıektiń birinen bastap Qytaıda sheteldik azamattardyń elden shyǵýy men kelýin retteıtin jańa Ereje kúshine enedi.
Ol 1986 jyldan bergi qoldanystaǵy erejelerdi almastyrmaq.
Jańa erejeler «zańsyz turýǵa» qatysty anyqtama beredi. Bul qujat sonymen birge zańsyz shet elge shyǵý men sheteldik azamattardyń Qytaıda jumys isteýine de qatysty bolmaq.
Ýaqytsha jumys nemese tájirıbeden ótýi kerek sheteldik stýdentterge qatysty jańashyldyqtar da engiziledi. Endi sheteldik stýdentterge ózderi oqıtyn oqý oryndarynan ýaqytsha jumys ornyna turý nemese tájirıbeden ótý ruqsatyn alǵannan keıin, ol aqparatty Qytaıdyń kóshi-qon organdaryna málimdep otyrý kerek.
Sonymen qatar, sheteldik azamattar jumys ornyn nemese oqý ornyn aýystyrǵanda bul týraly QHR-nyń kóshi-qon qyzmeti organdaryna ýaqtyly habarlaýlary tıis.
Sheteldik azamattardyń shet elge shyǵýy men kirýin retteıtin jańa ereje sheteldikterge vıza berý barysyn bir úlgige salady. Jańa ereje vızalardy 12 túrge bóledi. Vızalardyń jańa túrleri engiziledi - «R» vızasy biliktiligi joǵary sheteldik mamandarǵa, al «Q» vızasy Qytaıǵa týystaryna kelgen sheteldikterge beriledi.
QHR Memlekettik keńesi Keńsesiniń zańnamalyq suraqtar boıynsha ókiliniń málim etýinshe, jańa ereje ulttyq qaýipsizdikti qamtamasyz etý jáne baqylaýǵa sáıkes sharalardy kúsheıtýge baqyttalǵan.
