Qytaı vızasyna qatysty BAQ-taǵy aqparattyń jartysy dálelsiz - Bas konsýl
ALMATY. QazAqparat - Qytaıdyń Almatydaǵy Bas konsýly Chjan Veı týrıster úshin Qytaı vızasyn alý qıyndaǵandyǵy týraly aqparatqa pikir bildirdi, dep habarlaıdy QazAqparat tilshisi.
«Vızaǵa qatysty buqaralyq aqparat quraldarynda jazylyp jatqan máseleler bizdiń nazarymyzdy aýdartty. Jazylǵan maqalalardyń jartysy shynaıy aqparatqa sáıkes kelmeıdi. Obektıvti dálelder joq. Kóbisi oıdan shyǵarylǵan. Bas konsýldyq, Elshilik retinde óz quzyretimizdegi múmkindikterimiz boıynsha ǵana vıza beremiz. Vızany belgilengen tártip boıynsha beremiz. Ol saıasatty biz jasaǵan joqpyz. Qazaqstan týrısteri úshin vıza rásimdeýdi jeńildetýge barynsha kúsh salatyn bolamyz. Ol bizdiń jumysymyzdyń bir baǵyty. Ózimizdiń mınıstrlikke bul másele boıynsha usynysymyz ben keńesimizdi joldadyq», - dedi Bas konsýl.
Chjan Veı vıza alýdy jeńildetý baǵytynda birqatar jumystar atqarylǵanyn atap ótti.
«Búgingi kúni Qytaı-Qazaqstan qarym-qatynasy damyp, túrli salada keńeıip keledi. Bas konsýldyq vızalyq qoldaý erejeleri men saıasaty aıasynda eki el azamattarynyń qatynasy jaıly bolýy úshin vıza rásimdeýge barynsha kómektesip keledi. Biz qabyldaý kúnderin, ýaqytyn, kadrlar sanyn kóbeıtý, qosymsha qabyldaý terezeleri men ishki protsesterdi ońtaılandyrý sekildi sharalardy iske asyryp jatyrmyz. Vıza alýǵa ótinish bildirgender ishinde qart adamdar men jerleý rásimine ketip bara jatqan adamdardyń qujattaryn birinshi kezekte rásimdeý úshin «jasyl dáliz» ashtyq. Telefon keńesin iske qostyq. Qytaıdyń shetel azamattary úshin jasalǵan vıza saıasaty ózgergen joq», - dep sózin qorytyndylady Chjan Veı.
Aıta keteıik, qazaqstandyq jekelegen BAQ-ta 2018 jyldyń 1 aqpanynan bastap Qytaı týrıstik vızany berýge shekteý qoıatyndyǵy týraly aqparat taraǵan bolatyn.
