Qytaı ushaq tasıtyn úshinshi iri áskerı kemeni qurastyrdy

NUR-SULTAN. QazAqparat – Qytaıdyń Sınhýa aqparat agenttiginiń habarlaýynsha, 17 maýsymda Qytaı áskerı-teńiz kúshteriniń úshinshi ushaq tasyǵyshynyń qurylysy aıaqtaldy, dep habarlaıdy QazAqparat.

Qytaı ortalyq áskerı keńesiniń buıryǵyna sáıkes, jańadan jasalǵan úlken áskerı keme «Halyq azattyq armııasy teńiz flotynyń Fýtszıan kemesi» dep atalyp, áskerı kemege «18» degen nómir berildi.

Kemeniń jalpy salmaǵy 80 myń tonnany quraıdy, al onyń naqty qansha ushaq tasymaldaıtyny áli belgisiz.

Áskerı keme 2024 jyly resmı túrde paıdalanýǵa berilýi múmkin.

Sınhýa agenttiginiń habarlaýynsha, bul áskerı kemeni Qytaıdyń ózi jobalap, jasaǵan.

Aıta ketetin jaıt, Qytaı 2005 jyly Ýkraınadan Varıag kemesin satyp alyp, ony jóndep, «Lıaonın» dep atalatyn tuńǵysh ushaq tasyǵysh kemesin jasap shyǵarǵan bolatyn. Keme 2012 jyly paıdalanýǵa berilgen. Bul ushaq tasyǵysh kemesi 24 joıǵysh ushaqty tasymaldaı alady.

Qytaı óziniń ekinshi ushaq tasyǵysh kemesiniń qurylysyn 2017 jyly aıaqtady, al keıinirek «Shandýń» dep atalatyn ushaq tasyǵysh kemesi (№ 17) 2019 jyly paıdalanýǵa berilgen. «Lıaonın» kemesimen salystyrǵanda, «Shandýń» kemesi tasymaldaı alatyn joıǵysh ushaqtyń sany 36-ǵa deıin ulǵaıdy.

South China Morning Post gazetiniń habarlaýynsha, Qytaı birinshi kezeńde tórt ushaq tasyǵysh kemesin jasaýdy josparlap otyr. Qytaı kelesi kezeńde atomdyq ushaq tasyǵyshyn salýy múmkin degen boljam bar.