Qytaı ulty qartaıyp barady
ASTANA. QazAqparat - Resmı statıstıka boıynsha Qytaı turǵyndarynyń 15 paıyzynyń jasy 60-tan asyp ketken. Byltyrdyń ózinde QHR-da jumysqa jaramdy azamattardyń sany 2,5 mıllıonǵa qysqardy.
Máseleni sheshý úshin ótken jyly bılik «Bir otbasy - bir bala» saıasatyn jeńildetti. Biraq keleshekte sany arta beretin zeınetkerlerdiń zeınetaqysy qalaı bolmaq? Qytaı úkimeti osyǵan baılanysty zeınetkerlikke shyǵý jasyn birtindep ósirý máselesin qaraýda. Búginde bul elde áıelder 50, er adamdar 55 jasynda zeınetke shyǵady. 2030 jylǵa qaraı árbir tórtinshi qytaı 60-qa tolady eken.
Biraq ázirge naqty qaı jasta beınettiń zeınetin kórý buıyratyny belgisiz. Bılik naqty sheshimin jarııalaǵan joq. Sarapshylardyń aıtýynsha, Qytaıdaǵy qarttardyń kóbeıýine «Bir otbasy - bir bala» saıasaty áser etti. Bul el búginde tez damyp keledi, esesine tez qartaıyp barady.
Byltyr Beıjiń bıligi osy máseleniń aldyn alý úshin «Bir bala - bir otbasy» saıasatyn jumsartty. Eger erli-zaıyptylardyń bireýi otbasynda jalǵyz ósse, taǵy bir sábı súıýge ruhsat berdi. Saldarynan jańa týǵan nárestelerdiń sany ósti. Úkimetke ekinshi bala súıgisi kelgen 1 mıllıonnan astam otbasynan ótinish túsken. «Biraq bul kórsetkish tym az, biz kútkendeı nátıje bergen joq», - deıdi sarapshylar. Óıtkeni jastar tym jumysbasty bolyp ketken. Osylaısha, Qytaı úkimetiniń bala týý sanyn shekteý saıasaty bir máseleni sheshkenmen, úlken túıtkilge jol ashty. Ulttyń qartaıýy bıliktiń bas aýrýyna aınaldy, dep jazady 24.kz.
