Qytaı ulttyq valıýtasynyń aıyrbas baǵamynyń reformasyn jalǵastyrady
BEIJІŃ. Naýryzdyń 15-i. QazAqparat /Rýslan Súleımenov/ - Búkilqytaılyq halyq ókilderi jınalysynyń kezekti sessııasynyń qorytyndysy boıynsha jeksenbi,
naýryzdyń 14-inde Beıjińde Qytaı Halyq Respýblıkasy Memlekettik keńesiniń premeri Ven Tszıabaonyń qatysýymen baspasóz máslıhaty ótti.
Úkimet basshysynyń aıtýynsha, Qytaı ulttyq valıýtasy - ıýannyń (resmı ataýy - jenmınbı) aıyrbas baǵamyn reformalaýdy jalǵastyrady, sonymen birge onyń turaqtylyǵyn qoldaý sharalaryn júrgize beredi. «Jahandyq daǵdarys kezeńinde biz ıýannyń turaqty baǵamyn saqtap qaldyq, bul álemdik ekonomıkany qaıta kóterýge kómektesti», dep atap kórsetti Ven Tszıabao óz sózinde.
Degenmen, Qytaı premeriniń aıtýynsha, valıýta saıasaty máselesinde Qytaıǵa «qysym jasaýdyń qajeti joq», sebebi bul - «ıýannyń aıyrbas baǵamynyń reformasyna oń áserin tıgize qoımaıdy».
Ven Tszıabao sóz sózinde sondaı-aq álemdik ekonomıka úshin eń qıyn kezeńde - 2008 jyldyń shilde aıy men 2009 jyldyń aqpan aıy aralyǵynda qytaıdyń ulttyq valıýtasy 14,5 paıyzǵa qymbattaǵanyn atap kórsetti. 2009 jyly Qytaıdyń eksport jáne ımport kólemi 16 jáne 11 paıyzǵa qysqaryp, sáıkesinshe, eldiń saýda-sattyq teńgeriminiń belsendi saldosy 102 mıllıard AQSh dollaryna kemidi.
