Qytaı ulttyq qorǵanysyn kúsheıtip, Qarýly kúshterin jańartýda

Senbi kúni Beıjińde Búkilqytaılyq halyq ókilderi jınalysynyń 4-shi sessııasynda el úkimetiniń jumysy týraly baıandama jasaǵan Memlekettik keńes premeri Ven Tszıabao osyndaı málimdeme jasady.

Ven Tszıabaonyń aıtýynsha, ulttyq qorǵanysty nyǵaıtý men «qýatty halyq armııasyn» qurý - eldiń egemendigin, qaýipsizdigin, damý múddesin qorǵaýdyń mańyzdy kepili.

«Armııany jańartý jáne turaqtandyrý úderisin kúsheıtý, túrli maqsattaǵy áskerı mindetterdi oryndaýdaǵy armııanyń múmkindikterin jetildirý kerek»,- dep atap kórsetti Qytaı premeri óz sózinde.

Aıta ketý kerek, Qytaı 2011 jyly qarý-jaraqqa 601,1 mıllıard ıýan (91,4 mıllıard dollar) qarjy jumsaýdy josparlap otyr, 2010 jyly bul kórsetkish 533,4 mıllıar ıýan bolǵan. Bul týraly juma kúni Búkilqytaılyq halyq ókilderi jınalysynyń resmı ókili Lı Chjaosın málim etti.

Onyń aıtýynsha, bul qarajat «armııany laıyqty qarýlandyrýǵa», jeke quramdy jattyqtyrýǵa jumsalmaq. Degenmen, bul soma, Qytaıdyń jalpy ishki ónimimen salystyrǵanda mardymsyz ekenin aıtqan ol, kórshi elderge Qytaıdyń qaýip tóndirip otyrǵany týraly málimdemelerdi teriske shyǵardy.

«Qytaıdyń qarý-jaraqqa jumsap otyrǵan shyǵysy - basqa eldermen salystyrǵanda túk emes. Jumsalǵan qarjynyń ár bóligi egemendikti jáne aýmaq tutastyǵyn qorǵaýǵa baǵyttalady. Kórshi eldermen aradaǵy dostyqty saqtaý - Qytaı úshin mańyzdy», - dep atap kórsetti Lı Chjaosın.