Qytaı transshekaralyq týrızmdi damytýǵa nıetti

BEIJІŃ. QazAqparat - QHR Mádenıet jáne týrızm mınıstrligi týrısterdi tartý úshin Qytaıdyń shekaralas aımaqtaryna sheteldikterdiń kelýin jeńildetýge baǵyttalǵan joba jarııalady, dep habarlaıdy QazAqparat tilshisi.

«Transshekaralyq týrızm týraly» jobanyń túsindirmesinde Qytaıdyń shekaralas aýdandaryna týrıstik agenttikter uıymdastyrǵan týrıstik toptardyń kirý jáne shyǵý pýnktterin «yńǵaıly» tańdaı alatyny aıtylǵan.

Sonymen qatar, bul joba Qytaı men kórshiles elder arasynda ózara týrıstik saparlardy júzege asyrý úshin transshekaralyq týrızm salasynda tıisti kelisimderge qol qoıýdy kózdeıdi.

Jobada QHR úkimeti Qytaıdyń shekaralas aımaqtaryn kórshiles elderdiń shekaralas aımaqtarymen transshekaralyq týrızmdi damytý jáne shekaralyq aımaqta týrıstik baǵyttardy qurý úshin yntymaqtastyqty nyǵaıtýǵa shaqyratyny atap ótilgen.

QHR Syrtqy ister mınıstrligi Eýropa jáne Ortalyq Azııa departamenti dırektorynyń orynbasary Lıý Tszıanpınniń aıtýynsha, Qazaqstan men Qytaı dostas kórshiles elder, al shekaralyq yntymaqtastyqtyń bolashaǵy zor.

Jobany QHR Mádenıet jáne týrızm mınıstrligi men Syrtqy ister mınıstrligi, Bas keden basqarmasymen jáne Kóshi-qon qyzmetimen birlesip daıyndady.

Qazaqstan Respýblıkasy QHR Shyńjań-Uıǵyr avtonomııalyq aýdanymen (ShUAA) shektesedi. Statıstıkalyq málimetterge súıensek, bıylǵy 1-21 shilde aralyǵynda ǵana ShUAA-ǵa 25 mıllıon týrıst kelgen (2021 jyldyń osy kezeńimen salystyrǵanda 15,7%-ǵa ósti).

Foto: AP Photo / Ng Han Guan