Qytaı tili Reseıde keńinen tanymal bolyp keledi
BEIJІŃ. Qyrkúıektiń 16-sy. QazAqparat /Rýslan Súleımenov/ - Sársenbi kúni Beıjińde Qytaı tiliniń Reseıdegi jylynyń aıasynda qytaı tilinde jarııalanǵan onlaındyq konkýrstyń bastalý rásimi ótti.
«Jenmın jıbao» basylymynyń bas redaktorynyń orynbasary Mı Bohýanyń aıtýynsha, byltyr «orys tilinen onlaın-konkýrs» sátti ótkizilgennen keıin, «Jenmın jıbao» men «RIA «Novostı» agenttigi bıyl qytaı tilinen konkýrs uıymdastyryp otyr.
«Internetitń arqasynda, elderdiń arasyndaǵy geografııalyq qashyqtyqty qysqartýǵa, til men mádenıetti qarym-qatynas kópirine aınaldyrýǵa bolatyndyǵyna senemin», - dep atap kórsetti Mı Bohýa óz sózinde.
Al «Jenmınvana» vıtse-prezıdenti Lo Hýa myrza óz kezeginde, Reseıde qytaı tiliniń mamandaryna suranys artyp kele jatqanyn, jas reseılikterdiń kásibı mansabynda qytaı tilin bilý basty basymdyqqa aınalyp otyrǵanyn atap kórsetti.
«Konkýrstyń basty maqsaty qytaı tilin úırenýge degen yqylasty arttyrý, til biletin jastarǵa qytaı mádenıetin tereń zertteýge múmkindik jasaý, qytaı tilinde bilim alatyn jáne qytaı tilimen áýestenetin barsha adamdarǵa óz qabiletteri men múmkindikterin kórsetýge jaǵdaı jasaý bolyp tabylady», dep túıindedi óz sózin Lo Hýa.
Birneshe aptaǵa sozylatyn konkýrstyń jeńimpazdaryn Qytaıǵa tegin saıahat kútip tur.
