Qytaı Taýly Qarabaq máselesiniń beıbit jolmen sheshilýin qoldaıdy
BEIJІŃ. Mamyrdyń 28-i. QazAqparat /Rýslan Súleımenov/ - Taýly Qarabaq máselesin beıbit jolmen sheshý Ázirbaıjan men Armenııanyń múddelerine saı keledi,
sondaı-aq aımaqtaǵy turaqtylyq pen damýǵa oń áserin tıgizedi. Bul týraly Beıjińde beısenbi, mamyrdyń 27-si kúni QHR Syrtqy ister mınıstrliginiń resmı ókili Ma Chjaosıýı málim etti.
Mamyrdyń 23-inde Taýly Qarabaqta ótken «parlamenttik saılaýǵa» túsindirme bergen qytaı dıplomaty, Qytaı Halyq Respýblıkasynyń múddeli taraptardy jalpyǵa ortaq halyqaralyq-quqyqtyq normalar men BUU qararlaryna sáıkes, sondaı-aq konsýltatsııalar men dıalogtar ótkizý jolymen barsha jurt úshin ońtaıly sheshim tabýǵa shaqyratynyn atap kórsetti.
«Bul másele boıynsha Qytaıdyń ustanymy anyq jáne ózgermeıdi», - dep atap kórsetti Ma Chjaosıýı.
Buǵan deıin, EQYU-nyń qazirgi tóraǵasy, QR Memlekettik hatshysy -Syrtqy ister mınıstri Qanat Saýdabaev Taýly Qarabaqtaǵy «parlamenttik saılaýdyń» aımaqtaǵy problemany sheshýge kómektese qoımaıtynyn málim etken bolatyn.
