Qytaı Sý sharýashylyǵy mınıstrligi: QR men QHR arasyndaǵy qatynas - óńirdegi yntymaqtastyq úlgisi
BEIJІŃ. QazAqparat - 4 tamyzda QHR-daǵy QR Elshisi Shahrat Nuryshev QHR Sý sharýashylyǵy mınıstriniń orynbasary, Transshekaralyq ózenderdi qorǵaý jáne paıdalaný jónindegi qazaqstandyq-qytaılyq birlesken komıssııanyń teń tóraǵasy Chjoý Sıýevenmen kezdesti.
Taraptar transshekaralyq sý resýrstaryn paıdalaný salasyndaǵy eki el arasyndaǵy odan ári yntymaqtastyqtyń perspektıvalaryn talqylady. Atap aıtqanda, transshekaralyq ózenderdi qorǵaý men paıdalaný týraly úkimetaralyq kelisimdi iske asyrý joldary men Birlesken komıssııanyń alda ótetin 14-shi otyrysyna daıyndyq máselesi taqylandy.
«Eki el arasyndaǵy jan-jaqty strategııalyq áriptestik qatynas joǵary deńgeıde. Transshekaralyq ózenderdi bólý týraly kelisimdi kelisý jáne oǵan qol qoıý týraly ýaǵdalastyq eki eldiń tatý kórshilik, dostyq pen ózara tústinistigin damytýǵa múddeli ekendigin bildiredi», - dep atap ótti Sh. Nuryshev.
Óz kezeginde, Chjoý Sıýeven Qazaqstan men Qytaı dos kórshi jáne strategııalyq áriptes bolyp tabylatynyn atap ótti.
«Eki el arasyndaǵy qatynas óńirge yntymaqtastyq úlgisi bolmaq, al 2015 jyly qyrkúıekte qol qoıylǵan QR men QHR arasyndaǵy jan-jaqty strategııalyq áriptestiktiń jańa kezeńi týraly birlesken deklaratsııa ózara is-árekettiń jańa kezeńi bolyp tabylady», - dedi ol.
Transshekaralyq ózenderdi tıimdi paıdalaný jáne qorǵaý salasyndaǵy eki el arasyndaǵy uzaq merzimdi jáne jemisti ózara is-áreketti ornatý maqsatynda qytaılyq mamandandyrylǵan joǵary oqý oryndary bazasynda sý resýrstaryn basqarý salasynda qazaqstandyq mamandardy daıyndaýda jáne olardyń biliktiligin arttyrýda yntymaqtastyqty retteý týraly ýaǵdalastyqqa qol jetkizildi.
