Qytaı Soltústik Qazaqstan oblysyndaǵy mashına qurastyrý salasyn ınvestıtsııalaýǵa daıyn
ASTANA. QazAqparat - Qytaılyq kompanııa Soltústik Qazaqstan oblysyndaǵy mashına qurastyrý salasyna 65 mıllıard teńge salýǵa daıyn, dep habarlaıdy QazAqparat tilshisi oblys ákimine silteme jasap.
Atalǵan kelisim men ózge de 19 qujatqa ınvestorlardy tartý boıynsha óńirlik keńestiń otyrysynda qol qoıyldy.
«Eń iri joba retinde mashına qurastyrý klasteriniń qurylysyn aıtýǵa bolady. Oǵan qytaılyq kompanııa (Shi Yan De Rui Gong Mao Co. Ltd.) 65 mıllıard teńge ınvestıtsııalaýǵa daıyn», - dep habarlady oblys ákimi Qumar Aqsaqalov Ortalyq kommýnıkatsııalar qyzmetinde ótken baspasóz máslıhatynda.
Ákim keltirgen derekterge sáıkes, 2017 jyldyń alǵashqy 7 aıynda óńir ekonomıkasyna 78 mlrd teńge ınvestıtsııa tartylǵan.
Qoldanystaǵy mashına jasaý kásiporyna kelsek, olardyń tapsyrys portfeli 1,7 esege artyp, 32,5 mlrd teńgeni quraǵan. Kelisimderdiń basym bóligi munaı-gaz jáne temir jol keshenderine tıesili. Máselen, bıyl «PZTM» AQ Reseıge munaı-gaz salasyna arnalǵan 8 dana APRS-40 mashınasyn shyǵardy, onyń jalpy quny 300 mıllıon teńgeni quraıdy.
