Qytaı sotsıalızm jolymen júrýdi jalǵastyrady: Beıjińde Qytaı Kommýnıstik partııasynyń 18-shi sezi ashyldy
BEIJІŃ. 8 qarasha. QazAqparat - Búgin Beıjińde jergilikti ýaqyt boıynsha saǵat 9-da Halyqtar jınalysynyń úıinde Qytaı Kommýnıstik parııasynyń (QKP) 18-shi sezi ashyldy.
QKP Ortalyq Komıtetiniń bas hatshysy Hý Tszıntao óz baıandamasynda Qytaı qytaılyq ózgeshelikpen sotsalızm jolymen júrýdi jalǵastyratyndyǵyn atap ótti.
Keshe, 7 qarasha kúni 18-shi sezdiń baspasóz hatshysy Tsaı Mınchjao jýrnalısterge QKP OK-niń bas hatshysy Hý Tszıntao sezd barysynda eseptik baıandamasyn oqıtyndyǵyn málim etti. Onymen qosa uıymdastyrýshylar sezd ashyq ótý úshin jýrnalısterge barynsha jaǵdaılar jasalatyndyǵyn tilge tıek etti.
Baspasóz hatshysynyń sózine qaraǵanda, sezd Qytaı Kompartııasynyń Jarǵysyna túzetýler engizedi. Jarǵyda «ǵylymı damý teorııasynyń jańa túsindirmeleri» qamtylatyn bolady. Tsaı Mınchjao ýáde etkendeı, QKP OK saıası bıýrosynyń bolashaq quramy jýrnalısterge shyǵyp, suhbat beretin bolady.
Esterińizge sala keteıik, QKP-nyń alǵashqy sezi 1921 jyly Shanhaıda ótken bolatyn. Ol Gýanchjoý, Ýhan qalalarynda jáne bir ret Qytaı aýmaǵynan tys - Máskeýde ótti. Sezdiń ashylýyna baılanysty keshe Qytaı astanasynda qaýipsizdiktiń barlyq sharalary qolǵa alyndy.
