Qytaı sarapshylary QR Prezıdentiniń ShYU aıasyndaǵy bastamalaryn joǵary baǵalady
Qytaıdyń jetekshi «aqyl-oı» ortalyqtarynyń biri sanalatyn Qytaıdyń qazirgi zamanǵy halyqaralyq qatynastary akademııasynyń ǵylymı qyzmetkeri Sıýı Tao Nursultan Nazarbaevtyń Beıjiń-Astana-Máskeý-Berlın baǵyty boıynsha Eýrazııalyq joǵaryjyldamyqty temirjol magıstralin salý jónindegi usynysyna nazar aýdarǵan.
«Qazaqstan Prezıdenti usynǵan megajobanyń mańyzy óte zor. Óıtkeni ol saýda-ekonomıkalyq jáne mádenı-gýmanıtarlyq baılanystardy odan ári damyta otyryp, ShYU-na múshe memleketteriniń Eýropa elderimen tıimdi qarym-qatynastaryn qalyptastyrýǵa qajetti jaǵdaı jasaıdy»,-dedi sarapshy.
Ol sonymen qatar, Nursultan Nazarbaevtyń ShYU-na múshe memleketterdiń barlyǵynyń ulttyq valıýtalarymen eseptesýge kóshý qajettigi jóninegi bastamasynyń mańyzy zor ekenine toqtaldy.
«Mundaı tájirıbe syrtqy faktorlardyń saldarynan paıda bolatyn qarjylyq táýekelderdi azaıtady»,-dedi Sıýı Tao.
Qytaı qoǵamdyq ǵylymdar akademııasynyń Reseı, Shyǵys Eýropa jáne Ortalyq Azııa ınstıtýty dırektorynyń orynbasary Sýn Lıdiń pikirinshe, Nursultan Nazarbaevtyń Tsındaodaǵy ShYU sammıtinde kótergen bastamalary men QHR Tóraǵasy Sı Tszınpınmen ótkizgen kelissózderdiń qorytyndylary Qazaqstan basshysynyń kóregendi kóshbasshy ekendigin kórsetti.
«N.Nazarbaev ekonomıkany tsıfrlandyrý men jańǵyrtýǵa kóp kóńil bólip otyr. Qazaqstan basshysy atalǵan máselege memlekettiń ishki jaǵdaıynda da, naqtyraq aıtqanda óziniń Qazaqstan halqyna joldaǵan Joldaýynda da jáne halyqaralyq deńgeıde de basymdyq berip otyr. Men QR Prezıdentiniń ShYU sammıtinde tsıfrlandyrý men jańa tehnologııalar salasy boıynsha tájirıbe almasý maqsatynda alań qalyptastyrý jónindegi bastamalary týraly aıtyp otyrmyn. Bul rasynda da jahandyq ekonomıkanyń trendteriniń biri jáne onsyz qazirgi zamanda qarqyndy qadam jasaý múmkin emes»,-dedi ol.
Sarapshy ekonomıkany ártaraptandyrý, tsıfrlandyrý, elektrondy saýda sııaqty máselelerdiń Qazaqstan men Qytaı basshylarynyń kezdesýiniń qorytyndysy boıynsha jasalǵan málimdemege kirgizilgendigin aıtty.
«Qazaqstan Prezıdenti Qazaqstan men ózge elderge aýqymdy ınfraqurylymdyq qurylystyń kelýine yqpal etetin múmkindik pen mýltıplıkatıvti ekonomıkalyq qarqyndy birinshi bolyp baıqaǵan azamattardyń biri. Sondaı-aq Nursultan Nazarbaev QHR Tóraǵasynyń «Bir beldeý -bir jol» bastamasyn birinshi bolyp qoldady jáne «Nurly jol» jańa ekonomıkalyq saıasatyn usynyp, osy baǵytta yntymaqtastyqta tabandy jumys istep keledi.
Mysaly Tsındaoda ótken ShYU sammıtinde Nursultan Nazarbaev Beıjiń-Astana-Máskeý-Berlın baǵyty boıynsha Eýrazııalyq joǵaryjyldamyqty temirjol magıstralin salý jobasyn salýdy usyndy»,-dedi Sýn Lı.
