Qytaı polıtsııasy Shyńjańda 23 ekstremıstik topty quryqtady
ASTANA. QazAqparat - Shyńjań Uıǵyr avtonomııaly ólkesi (ShUAÓ) polıtsııasy 23 ekstremıstik jáne terrorıstik baǵyttaǵy topty quryqtady. Qolǵa túskenderdiń bári ekstremıstik materıaldardy zerttep, jarylǵysh zattardy daıyndaý tájirıbesimen almasqan. Shara barysynda 200-den astam jarylǵysh zat tárkilendi, - dep habarlaıdy RIA Novostı.
Aıta keteıik, Qytaıda 1 jyldyq merzimmen antıterrorıstik operatsııa bastaldy. Reıd negizinen ıslam dinin ustanatyn uıǵyrlar meken etetin ShUAÓ-niń ońtústik okrýgterinde júrgizildi.
Shyńjań - qaýipsizdik turǵysynan alǵanda bul eldegi eń turaqsyz ólke. Qytaı bıligi habarlaǵandaı, onda «Shyǵys Túrkistan» terrorıstik toby áreket etedi. Málimetter boıynsha, olardyń «Ál-Kaıdamen» baılanysy bar bolýy múmkin.
Sońǵy jarty jylda Qytaıda iri birneshe terakt oryn aldy. Esterińizge sala keteıik, sońǵy terakt 22 mamyr kúni Uıǵyr avtonomııalyq ólkesiniń Úrimji qalasyndaǵy bazarda bolyp, jarylystan 39 adam qaza taýyp, 90-nan astamy jaraqattandy.
