Qytaı parlamenti úkimetti reformalaý jobasyn maquldady

QHR Memlekettik keńesi (joǵary atqarýshy organ) reformasynyń jobasy Halyq ókilderiniń búkilqytaılyq jınalysy (HÓBKJ, joǵary zańnamalyq organ) depýtattarynyń qaraýyna jeksenbi, 10 naýryz kúni usynyldy.

Maquldanǵan jobaǵa sáıkes, Memlekettik keńes janyndaǵy mınıstrlikter sany 27-den 25-ke deıin qysqarady. Reforma temir jol mınıstrligin joıýdy jáne onyń qyzmetterin Kólik mınıstrligine tapsyrýdy kózdeıdi. Budan basqa, Qytaıdyń basty temirjol kompanııasy qurylady.

Qytaıdyń Densaýlyq saqtaý mınıstrligi jáne balany jospar boıynsha týý memlekettik komıteti densaýlyq saqtaý isteri jáne balany jospar boıynsha týý isteri jónindegi biryńǵaı memlekettik komıtetke biriktiriledi.

Azyq-túlik jáne dárilik quraldardy baqylaýdyń memlekettik basqarmasynyń dárejesi mınıstrlik mártebesine deıin arttyrylady

Reformaǵa sáıkes teńiz isteri jónindegi memlekettik basqarma qaıta qurylymdalady jáne Energetıka jónindegi memlekettik basqarma reformalanady. Budan basqa, eki vedomstvony biriktirý esebimen baspasóz, baspa, radıo habar taratý, kınematografııa jáne teledıdar isteri jónindegi jańa basty memlekettik basqarma qurylady.

Esterińizge sala keteıik, Beıjińde qytaılyq parlamenttiń jyl saıynǵy sessııasy ótýde, ol 17 naýryzda aıaqtalady. Sessııanyń barysynda QHR úkimetiniń jańa quramy jasaqtalady.