Qytaı parlamenti 14-shi besjyldyq josparyn qabyldady

BEIJІŃ. QazAqparat – Búkilqytaı halyq ókilderi quryltaıy (eldiń joǵary zań shyǵarýshy organy) 13-shaqyrylymy tórtinshi sessııasynyń jabylý saltanatynda áleýmettik-ekonomıkalyq damýdyń 14-shi besjyldyq josparyn (2021-2025 jj.) jáne 2035 jylǵa deıingi uzaq merzimdi josparlar qabyldady, dep habarlaıdy QazAqparattyń menshikti tilshisi.

Saltanatty sharaǵa qatysqan 2 896 adamnyń ishinnen 2 873 delegat 14-shi besjyldyq josparyn (2021-2025 jj.) jáne 2035 jylǵa deıingi uzaq merzimdi josparlardy qabyldaýdy maquldady. Usynylǵan besjyldyq josparǵa qarsy 11 adam daýys berdi, 12 adam daýys berýden bas tartty.

Bul qujatta QHR-dyń aldaǵy bes jylǵa áleýmettik-ekonomıkalyq damýdyń negizgi baǵyttary men maqsatty kórsetkishteri jazylǵan. Endi Qytaı 14-shi besjyldyq jospar kezinde JІÓ-niń josparly ósý kórsetkishin bir jyl buryn belgilep otyrady. 2021 jylda úkimet JІÓ-ni 6%-ǵa ósirýdi kózdep otyr.

2020 jyldyń qorytyndysyna saı QHR ekonomıkasy 2,3%-ǵa ósti. Bul sońǵy 40 jyldaǵy eń tómen kórsetkish. Sonymen qatar Qytaı ekonomıkasynyń kólemi 100 trln ıýannan (15 trln dollardan astam) asyp ketken.

Qytaı bıliginiń málimdeýinshe, 14-shi besjyldyqtyń sońyna qaraı QHR joǵary tabys deńgeıi bar elge aınalmaq. 2035 jylǵa qaraı ulttyq ekonomıka kólemi men jan basyna shaqqandaǵy JІÓ-ni eki esege ulǵaıtpaq.

Eske sala keteıik, 4-11 naýryz aralyǵynda Búkilqytaı halyq ókilderi quryltaıynyń 13 shaqyrylǵan 4-sessııasy ótti.

Avtory Rýslan Súleımenov