Qytaı óziniń damý modeli negizinde álemge jańa múmkindik usynýǵa daıyn - Sı Tszınpın

ShANHAI. QazAqparat – Qytaı óziniń jańǵyrý modelindegi jetistikteri negizinde álemge jańa múmkindik usynýǵa ázir. Bul týraly QHR Tóraǵasy Sı Tszınpınniń Shanhaıda ótip jatqan «Qytaıdyń jańǵyrýy jáne beıbitshilik» taqyrybyndaǵy «Lantın» forýmyna qatysýshylarǵa joldaǵan jazbasha úndeýinde aıtylǵan, dep habarlaıdy QazAqparat tilshisi.

«Qytaı óziniń jańǵyrý jetistikteri negizinde álemniń damýyna jańa múmkindikter usynýǵa, basqa eldermen yntymaqtastyqty arttyrýǵa daıyn», - delingen Qytaı basshysynyń úndeýinde.

Al atalǵan forýmnyń ashylý saltanatyna qatysqan QHR Syrtqy ister mınıstri Tsın Gan Qytaıdyń jańa damý modeli álemdik ekonomıkaǵa tyń serpin beretinin atap ótti.

Onyń aıtýynsha, Qytaı búginde 140-tan astam elder men aımaqtardyń iri saýda seriktesi. Kún saıyn álem elderine 320 mln dollar tikeleı qytaılyq ınvestıtsııa baǵyttalady jáne aı saıyn 3 myńnan astam sheteldik ınvestorlar qarjylandyratyn kásiporyndardy ashyp jatyr.

«Qytaıdyń 1,4 mlrd-tan astam halqy jańa jańǵyrý jolyna tústi. Bul álemdik ekonomıkaǵa úlken serpin beretini sózsiz», - dep atap ótti ol.

QHR SІM basshysy álem halyqtarynyń jalpy órkendeýi úshin barlyq elderdiń teń quqyly damýy qajet ekenin aıtty.

Onyń málimdeýinshe, «Bir beldeý - bir jol» jáne Jahandyq damý bastamasy – Qytaı tarapynyń halyqaralyq qaýymdastyq úshin birdeı damý men órkendeýge ashqan joly. Tsın Gan «Bir beldeý - bir jol» aıasynda 10 ishinde 3 myńnan astam jobanyń qolǵa alynǵanyn málim etti.

Rýslan Súleımenov