Qytaı orbıtalyq stantsııa qurylysyn júrgizýge ǵarysh kemesin ushyrdy
BEIJІŃ. QazAqparat – Bortynda úsh ǵaryshkeri bar «Shenchjoý-12» basqarylatyn ǵarysh kemesi beısenbi kúni tańerteń Qytaıdyń soltústik-batysyndaǵy Gobı shólindegi «Tszıýtsıýan» ǵarysh aılaǵynan ushyryldy. Kemeniń ushyrylýynyń tikeleı translıatsııasyn Qytaıdyń ortalyq telearnasy jasady, dep habarlaıdy QazAqparattyń menshikti tilshisi.
Apparatty orbıtaǵa shyǵarý úshin CZ-2F tasymaldaýshy zymyrany qoldanyldy. «Shenchjoý-12-niń» ushyrylýy sońǵy bes jylda alǵashqy ret bolyp otyr. Sońǵy basqarylatyn ǵarysh mıssııasy 2016 jyly júzege asyrylǵan.
«Shenchjoý-12» basqarylatyn ǵarysh kemesi «Tszıýtsıýan» ǵarysh aılaǵynan 17 maýsym kúni jergilikti ýaqyt boıynsha saǵat 09:22-de ushyryldy.
Mıssııanyń basty maqsaty – qytaılyq ǵarysh stantsııasynyń orbıtadaǵy jumystaryna qyzmet kórsetip, testileý ótkizý.
Orbıtaǵa shyqqanan keıin ǵarysh kemesi avtomatty túrde «Tıanhe» ǵarysh stantsııasynyń negizgi modýline jaqyndap, onymen túıisedi. Nátıjesinde osy modýlmen jáne «Tıanchjoý-2» júk kemesimen orbıtalyq keshen qurady. Odan keıin «Shenchjoý-12» kemesiniń bortyndaǵy ǵaryshkerler negizgi modýlge aýysyp, orbıtada úsh aı merzimge qalady.
Ǵarysh aılaǵyna arnalǵan «Tıanhe» bazalyq modýli ǵaryshqa osy jyldyń sáýirinde, «Tıanchjoý-2» júk kemesi mamyrynda jiberilgen.
