Qytaı orbıta stantsııasyna Tıanchjoý-4 júk kemesin ushyrdy

BEIJІŃ. QazAqparat – Seısenbide Qytaı óziniń orbıtalyq stantsııasymen túıisetin «Tıanchjoý-4» júk kemesin ushyrdy. Bul týraly Qytaıdyń basqarylatyn kosmonavtıka baǵdarlamasynyń keńsesi (CSMA) málimdedi, dep habarlaıdy QazAqparat menshikti tilshisi.

Habarlamaǵa sáıkes, «Tıanchjoý-4» ǵarysh kemesi seısenbide Qytaıdyń ońtústigindegi Haınan provıntsııasyndaǵy Venchan ǵarysh aılaǵynan «Chjanchjen-7» zymyran tasyǵyshymen orbıtaǵa shyǵaryldy.

«Tıanchjoý-4» QHR orbıtalyq stantsııasyna alty aılyq ǵaryshkerlerge arnalǵan qordy, stantsııaǵa qyzmet kórsetýge arnalǵan qosalqy bólshekterdi jáne ǵaryshtyq zertteýler júrgizýge arnalǵan jabdyqtardy jetkizedi.

Orbıtalyq keshen «Tıanhe» ǵarysh stantsııasynyń negizgi modýlinen jáne «Tıanchjoý-3» júk kemesinen turady.

Maýsym aıynda basqarylatyn «Shenchjoý-14» ǵarysh kemesi ushyrylady. Ol úsh taıkonavty (QHR-da ǵaryshkerlerdi osylaı ataıdy) orbıtalyq stantsııaǵa jetkizedi, olar Qytaı ǵarysh stantsııasyn iske qosý jumystaryn jalǵastyrady jáne alty aı orbıtada bolady.