Qytaı NEV-avtomobılderi óndirisi úshin halyqaralyq baılanysty nyǵaıtýǵa daıyn

BEIJІŃ. QazAqparat – Qytaı bıligi jańa energııa kózderimen (NEV) júretin avtomobıl óndirisinde basqa eldermen baılanysyn nyǵaıtpaq. Bul týraly IV Dúnıejúzilik NEV-avtomobılderi kongresine qatysýshylarǵa úndeýi barysynda QHR Memlekettik keńesiniń premeri Lı Ketsıan málimdedi, dep habarlaıdy QazAqparat menshikti tilshisi.

Eldiń úkimet basshysy Qytaıdyń álemdegi eń iri avtomobıl shyǵarýshy jáne tutynýshy ekenin atap ótti. Sońǵy jyldary elde jańa energııa kózderimen (NEV) júretin avtomobıl óndirisiniń qarqyndy ósýi baıqalady.

«Qytaı NEV-avtokólikterimen baılanysty salalarda halyqaralyq yntymaqtastyqty nyǵaıtýdy jalǵastyra beredi», - dedi QHR Memkeńesiniń premeri.

Lı Ketsıan Qytaıdyń «avtomobıl ónerkásibin damytýda jańa taraýdy birlesip ashý úshin» barlyq múddeli taraptarmen ózara tıimdi jumys isteýge daıyn ekendigin jetkizdi.

25-28 tamyz aralyǵynda Beıjińde IV Dúnıejúzilik NEV-avtomobılderi kongresi ótip jatyr. Qytaı jeńil avtomobılder qaýymdastyǵynyń málimetteri boıynsha, QHR 2022 jyldyń birinshi jartyjyldyǵynda jańa energııa kózderimen qozǵalatyn 360 myńnan astam avtomobıl eksporttady (2021 jyldyń sáıkes kezeńimen salystyrǵanda kórsetkish eki eseden astam ósken). Qytaıda shyǵarylǵan jańa avtomobılder negizinen Batys Eýropa men Ońtústik-Shyǵys Azııa elderine eksporttalady.

Foto: kassioun.org