Qytaı naryǵy qazaqstandyq ónimder úshin tolyqtaı ashyq – Elshi

NUR-SULTAN. QazAqparat – Qytaı Halyq Respýblıkasynyń Qazaqstan Respýblıkasyndaǵy Tótenshe jáne Ókiletti Elshisi Chjan Sıao qazaqstandyq ónimderdi óz eline ımporttaý áleýetine qatysty pikir bildirdi, dep habarlaıdy «QazAqparat» HAA tilshisi.

«Aýyl sharýashylyǵyna keler bolsaq, ákimshilik jáne kedendik kedergiler túgeldeı joıyldy. Endi qytaı naryǵy Qazaqstannyń et, qus, un, bıdaı, jalpy kez kelgen ónimniń ımportyna tolyqtaı ashyq», - dedi Chjan Sıao Qytaı halyq-azattyq armııasynyń qurylýyna 92 jyl tolýyna oraı ótkizilgen saltanatty qabyldaý sharasynda.

Onyń aıtýynsha, Qytaı úlken kólemdegi ımportty qajet etedi.

«Bar másele – ónimderdiń kóleminde. Sebebi, Qytaı – óte úlken. Al mundaǵy usynystyń kólemi – shekteýli (kólemi jóninen). Qazaqstan 5 nemese 50 tonna ónimdi kóp kórýi múmkin, alaıda Qytaı úshin bul – túk emes. Ol tipti ShUAA-ǵa (Shyńjań-Uıǵyr avtonomııalyq aýdany) da jetpeıdi», - dep málim etti elshi.

Búgin Nur-Sultanda QHR-dyń Qazaqstan Respýblıkasyndaǵy elshiliginiń uıymdastyrýymen Qytaıdyń halyq-azattyq armııasynyń qurylýyna 92 jyl tolýyna oraı saltanatty qabyldaý rásimi ótti. Sharaǵa qazaqstandyq jáne qytaılyq dıplomattar, eki eldiń qorǵanys vedomstvolarynyń ókilderi qatysty.

Avtor: Azamat Syzdyqbaev