Qytaı Moldova armııasyna birqatar tehnıkany syıǵa berdi
ASTANA. QazAqparat - Qytaı búgin Moldova ulttyq armııasyna 15 mln. leı somasyndaǵy tehnıka toptamasyn: toǵyz shaǵyn avtobýsty, úsh jedel járdem mashınasyn, tórt refrıjeratordy, on elektr generatoryn, sondaı-aq bólshekterdi syıǵa berdi, dep habarlaıdy MOLDPRES.
Іs-shara barysynda qorǵanys mınıstriniń orynbasary George Galbýra bul kómektiń qymbat ınvestıtsııany qajet etetin Ulttyq armııany jabdyqtaýdaǵy mańyzdy úles sanalatynyn málim etti.
«Ulttyq áskerimizdiń jabdyqtary birlesken kelisim negizinde Qytaı ulttyq qorǵanys mınıstrliginiń usynǵan tehnıkalyq jabdyqtar toptamasymen tolyqty. Osy kómek úshin, sondaı-aq kórsetilip jatqan barlyq qoldaý úshin alǵys bildiremiz», - dedi Galbýra.
Óz kezeginde MR-daǵy QHR elshisi Chjan Inhýn atap ótkendeı, sońǵy jyldary áskerı saladaǵy yntymaqtastyq jandanyp, eki el arasyndaǵy senimdilikti nyǵaıtýǵa yqpal etýde.
«Osy ozyq tehnıkalardyń sizder úshin zamanaýı qoldaý bolyp tabylatynyna úmittenemiz. Sońǵy 20 jylda Qytaı men Moldova arasynda, ásirese saıası, ekonomıkalyq jáne gýmanıtarlyq salalarda jaqsy ekijaqty qatynas ornady. Mundaı áreketter azamattardyń ómirin jaqsartýǵa baǵyttalady», - dedi elshi. 
