Qytaı mobıldi qosymshalardy baqylaýdy kúsheıtpek
ASTANA. QAZAQPARAT - Qytaıdyń ǵalamtor-aqparaty isteri jónindegi memlekettik keńsesi (ǴAMK) mobıldi qosymshalarǵa qoıylatyn baqylaýdy kúsheıtpek. Bul týraly "Hýantsıý shıbao" gazeti habarlady.
Seısenbi kúni maquldanǵan qaýlyǵa sáıkes ázirleýshiler qosymshalardy qoldanýshylardy shyn aty-jónimen tirkeýge jáne baǵdarlamalarynyń kómegimen beriletin aqparattyń monıtorıngin júrgizýge mindetti. Qytaıdyń zańnamasyn buzatyn tulǵalardyń eseptik jazbalary májbúrli túrde jabylady.
Sondaı-aq ázirleýshiler paıdalanýshylardyń belsendiligi týraly aqparatty kemi 60 kún saqtaýy tıis. Mobıldi qosymshalar dúkenderiniń ıelerin óz platformalarynda baǵdarlamalar satatyn ázirleýshilerdi qatań tekserýge mindetteıdi, deıdi TASS.
Jańa erejeler bıylǵy 1 tamyzdan bastap kúshine enedi. Qaýlyda kórsetilgendeı, atalmysh erejeler Qytaıdyń mobıldi ǵalamtor paıdalanýshylaryn terrorızm, alaıaqtyq, pornografııa, jalǵan málimet taratýdan jáne aqparattyń urlanýynan qorǵaıdy.
2015 jyldyń sońynda QHR-da ǵalamtor paıdalanýshylardyń sany 688 mıllıonǵa jetken. Onyń ishinde 620 mıllıon qoldanýshy jelige smartfon arqyly kirgen. ǴAMK málimetinshe Qytaı dúkenderinde qazir 4 mln astam baǵdarlama satylady.
