Qytaı men Ózbekstan 2017 jylǵa qaraı ekijaqty taýar aınalymyn 5 mlrd. AQSh dollaryna jetkizýge nıetti
TAShKENT. 10 qyrkúıek. QazAqparat - QHR Tóraǵasy Sı Tszınpınniń Ózbekstanǵa memlekettik sapary barysynda birqatar ekijaqty qujattarǵa qol qoıyldy.
Osyǵan deıin habarlanǵandaı, QHR basshysy Ózbekstan Respýblıkasyna 8 qyrkúıek kúni ÓR Prezıdenti Islam Karımovtyń shaqyrýymen keldi.
Kelissózderdiń qorytyndysy boıynsha Ózbekstan Respýblıkasy men Qytaı Halyq Respýblıkasynyń arasynda saıası, saýda-ekonomıkalyq, ınvestıtsııalyq jáne mádenı-gýmanıtarlyq salalarda yntymaqtastyqtyń uzaq merzimdi perspektıvalary men basym baǵyttaryn anyqtaıtyn qujattarǵa qol qoıyldy. Atap aıtqanda, ÓR men QHR arasynda dostyq jáne yntymaqtastyq kelisimine qol qoıyldy.
Sonymen qatar, QHR men ÓR basshylary Ózbekstan Respýblıkasy men Qytaı Halyq Respýblıkasynyń ekijaqty strategııalyq áriptestik qarym-qatynastaryn odan ári damytý jáne tereńdetý jónindegi birlesken deklaratsııaǵa qol qoıdy. Qos tarap taýar saýdasynyń aýqymyn keńeıtip, 2017 jylǵa qaraı eki jaqty taýar aınalymyn 5 mlrd. AQSh dollaryna jetkizbek.
Sonymen qatar, eki jaq arasynda ınvestıtsııalyq jáne basqa da kelisimderge qol qoıyldy.
Búgin eki eldiń basshysy tarıhı qala Samarqandqa barady.
