Qytaı men Qazaqstan qatynastarynyń jańa «altyn 30 jyldyǵyna» qadam basty - Sı Tszınpın

SIANЬ. QazAqparat - QHR Tóraǵasy Sı Tszınpın Qasym-Jomart Toqaevqa qonaqjaılyq iltıpat bildirip, 70 jas mereıtoıymen quttyqtady, dep habarlaıdy QazAqparat Aqordanyń baspasóz qyzmetine siltememen.

«Osyndaı aıtýly kúni Siz Qytaıǵa memlekettik saparmen kelip otyrsyz. Bul bizdiń ekijaqty yntymaqtastyǵymyzdyń joǵary deńgeıde ekenin kórsetedi jáne Qytaımen tyǵyz baılanystaryńyzdy taǵy da rastaıdy. Qytaı men Qazaqstan qytaı-qazaq qatynastarynyń jańa «altyn 30 jyldyǵyna» qadam basty. Bizdiń elderimiz dostyq, ózara qoldaý dástúrin damytyp, tıimdi yntymaqtastyqty tereńdetýi qajet», – dedi QHR Tóraǵasy.

Kezdesý barysynda taraptar eki eldiń saýda-ekonomıka, munaı-gaz, munaı hımııasy, energetıka, bilim jáne ǵylym, qarjy salalaryndaǵy jan-jaqty yntymaqtastyǵyn damytý, kólik-tranzıt áleýetin arttyrý máselelerin talqylady. Sondaı-aq olar halyqaralyq jáne óńirlik kún tártibindegi máseleler jóninde pikir almasty.

Eske salaıyq, búgin QR Prezıdenti Q.Toqaev Qytaıǵa memlekettik saparmen bardy.

Sapar aıasynda Memleket basshysy QHR Tóraǵasy Sı Tszınpınmen kelissóz júrgizdi.

Prezıdent 18 mamyrda Qytaıdyń iri kompanııalarynyń basshylarymen kezdesedi jáne memlekettik sapar aıasynda birqatar shara ótkizedi, sondaı-aq Sıan qalasyndaǵy qurǵaq portta Qazaqstannyń logıstıka ortalyǵynyń irgetasyn qalaý rásimine qatysady.

Memleket basshysy 19 mamyrda «Ortalyq Azııa – Qytaı» sammıtine qatysady. Sonymen qatar Prezıdent elimizdiń Sıan qalasyndaǵy Bas konsýldyǵynyń saltanatty túrde ashylý rásimine qatysady dep josparlanyp otyr.