Qytaı men Qazaqstan ІT salasynda áriptestikti damytpaq
ALMATY. QazAqparat - Qytaı men Qazaqstan ІT salasynda áriptestikti damytpaq, dep habarlaıdy QazAqparat tilshisi.
Chjetszıan provıntsııasynyń kompanııalary qazaqstandyq seriktesterimen tsıfrlyq tehnologııalardy damytý boıynsha birqatar kelisimge keldi.
Almatyda ótip jatqan «Chjetszıan-Qazaqstan» ınvestıtsııalyq forýmyna atalǵan aımaqtyń 77 kompanııasy basshylary keldi.
«2016 jyly Qazaqstan men Chjetszıan provıntsııasy arasyndaǵy taýar aınalymy 500 mln dollar boldy. Aımaqtyń 20 kompanııasy Qazaqstanǵa 520 mln AQSh dollaryn ınvestıtsııalady.
Qazaqstandyq kásipkerler 23 mln dollar kapıtalmen 16 kásiporyn qurdy. «Bir beldeý - bir jol» baǵdarlamasy aıasynda saýda- ónerkásip salasynda seriktestigimiz arta túsedi degen oıdamyz. Forýmda biz IT, qorshaǵan ortany qorǵaý, densaýlyq saqtaý, týrızm, qarjy salasyndaǵy ózara yyntymaqtastyq týraly talqylaıtyn bolamyz», - dedi Chjetszıan provıntsııasy Halyqtyq úkimetiniń vıtse-gýbernatory Lıan Lımın.
Búgingi forým barysynda eki el arasyndaǵy ІT salasyndaǵy ózara kelisimshart jasaldy.
«Tech Garden» kompanııasy men qytaılyq «Jumo» elektrondyq kommertsııa kompanııasy arasynda b2b formatynda kelisim shart jasaldy. Sondaı-aq, «OpenLab» laboratorııasy elektrondyq qyzmet, qarjylyq tranzaktsııalar, saqtandyrý, logıstıkalyq saladaǵy ІT tehnologııalardy bir derek qoryna jınaqtaýǵa kómektesedi. Bul zerthana tsıfrlyq pishindegi qatynastardy modeldeýge múmkindik beretin ǵylymı baza bolyp otyr.
Aıta ketý kerek, kelisimge úsh tarap qol qoıdy.
Úsh jaqty kelisim Almaty aglomeratsııasyn damytýǵa baǵyttalǵan.
«Memorandým aıasynda Almaty óńiriniń saýda salasyn damytýǵa baǵyttalǵan naqty jobalar qarastyrylatyn bolady», - dedi «Almaty Tech Garden» ınnovatsııalyq tehnologııalar parki avtonomdy klaster qorynyń bas dırektory Sanjar Kettebekov.
Endi otandyq ІT mamandar transulttyq kompanııalarmen tyǵyz baılanysa otyryp, ulttyq naryqqa tarta alady.
Ortaq kásiporyndardy qarjylandyrý mindeti «Almaty Tech Garden» men qytaı tarapyna teńdeı bólinetin bolady.
Chjetszıan - Qytaıdyń ońtústik batysyndaǵy iri aımaq. JІÓ kórsetkishi boıynsha eldegi 4 jetekshi óńirlerdiń biri. Ásirese, teńiz porty retindegi áleýeti óte úlken. Taýar aınalymy boıynsha 8 jyl qatarynan álemdegi 1 oryndy alyp keledi. Aımaqta 4 200 kóterme saýda ortalyǵy ornalasqan.
«Alibaba Group» kompanııasynyń bas keńsesi de Hanchjoý qalasynda ornalasqan.
