Qytaı men AQSh jańa saýda kelisimin jasaýǵa ýaǵdalasty

ASTANA. QazAqparat - Argentınada ótken G20 sammıti kezinde AQSh jáne Qytaı basshylary Donald Tramp pen Sı Tszınpın 90 kún ishinde jańa saýda kelisimin jasaýǵa ýaǵdalasty, dep habarlaıdy «QazAqparat» HAA Washington Post-qa silteme jasap.

«Tramptyń Respýblıkalyq partııadaǵy qyzmettesteri, ınvestorlar, búkil álemdik ekonomıka asyǵa kútken kelisimge Býenos-Aırestegi iskerlik keshki as kezinde qol jetkizildi», - dep jazady basylym.

AQSh prezıdenti Qytaıdyń jalpy quny 200 mıllıard AQSh dollaryna deıingi ónimderine qoıylatyn tarıfti 2019 jylǵy 1 qańtardan bastap 10 protsentten 25 protsentke deıin arttyrmaýǵa kelisti. Degenmen, eger taraptar úshaılyq moratorıı kezinde kelisimshart jasaspasa, keler jyldyń qańtarynan bastap kedendik baj tarıfi 25% deıin sharyqtaıtyn bolady.

Qytaı tarapy AQSh-tan aýylsharýashylyq ónimderin, energııa tasyǵyshtardy, ónerkásiptik jáne basqa da taýarlardy satyp alýǵa kelisti. Satyp alý kólemi úlken bolatyny belgili, biraq naqty tsıfrlar ázirge anyq emes.

Tramp pen Tszınpın amerıkalyq tehnologııalar, kıbershabýyldar jáne kıbertonaýshylyq salalaryndaǵy problemalardy sheshý úshin kelissózderdi bastaýǵa kelisti.

«Bul, AQSh pen Qytaı arasyndaǵy yntymaqtastyqqa sheksiz múmkindikter ashatyn tıimdi kezdesý boldy. Men úshin Tóraǵa Tszınpınmen jumys isteý úlken qurmet», - dedi Tramp kezdesýden keıin.

Sarapshylardyń aıtýynsha, AQSh pen Qytaı KHDR ıadrolyq baǵdarlamasy jónindegi yntymaqtastyq jáne Qytaıdan AQSh-qa opıoıdtik analgetık fenatıldi zańsyz tasymaldaýdy shekteý salasynda aıtarlyqtaı jetistikke qol jetkizilgen.

Washington Post basylymynyń jazýynsha, bıyl Vashıngton men Beıjiń arasynda «saýda soǵysy» bastalǵan bolatyn. AQSh Qytaıdan ımporttalatyn, jalpy quny 200 mıllıard AQSh dollaryn quraıtyn taýarlarǵa 10% mólsherinde kedendik baj engizgen. Qytaı da buǵan jaýap retinde birneshe sharalar qarastyrǵan bolatyn.