Qytaı men AQSh arasynda saýda kelissózderi qaıta jandanbaq

OSAKA. QazAqparat - Búgin Osakada - «Úlken jıyrmalyq» (G 20) sammıtinde AQSh Prezıdenti Donald Tramp pen Qytaı lıderi Sı Tszınpın kezdesti. Bul týraly QazAqparat CNN-ge silteme jasap habarlaıdy.

Bir saǵatqa sozylǵan kezdesýden keıin Prezıdent Tramp Qytaımen saýda kelissózderi qaıta jandanatynyn, jańa tarıfter engizý keıinge qaldyrylǵanyn málimdedi.

«Biz qajet jolǵa qaıta tústik Budan ne shyǵatynyn kóremiz», - dedi Tramp kezdesýden keıin.

Sál keıinirek sammıttegi sońǵy baspasóz máslıhaty barysynda Tramp jýrnalısterge eger Qytaımen ortaq kelisim tabylmasa, qazirgi baj salyǵy qalatynyn atady.

«Men ázirge Qytaı úshin tarıfterdi kótermeýge ýáde berdim. ıAǵnı eleýli soma qospaımyz», - dedi ol jýrnalısterge.

Sondaı-aq, Tramp AQSh pen Qytaı arasyndaǵy kelissózder toqtaǵan jerinen qaıta jandanatynyn aıtty.

«Kezdesý tamasha ótti. Kelissózder jalǵasatyn bolady», - dedi Tramp.

Xinhua jańalyqtar agenttigi de eki el arasyndaǵy ekonomıkalyq jáne saýda kelisimderi qaıta jandanatynyn habarlaýda. Kezdesý kezinde Sı Tszınpın Qytaıdyń saýda kelissózderin jalǵastyrýǵa jáne AQSh-pen alaýyzdyqty jeńildetýge nıetti ekenin atap ótti.Onyń aıtýynsha, kelissózder teńdikke jáne ózara qurmetke negizdelip, qos taraptyń da zańdy múddelerin nazarǵa alýy tıis.

Sı Tsınpın álemdegi eń úlken eki ekonomıka saıyp kelgende ózara tıimdi sheshimge kelip, pikir almasý men keńester arqyly túsinbestikterdi retteýge mindetti ekenin aıtty. Ol Qytaı men AQSh yntymaqta bolsa ǵana utyp, alaýyz bolsa utylatynyn aıryqsha atady.

«Yntymaq pen dıalog kelispeýshilik pen konfrontatsııadan jaqsy», - dedi ol Tramppen kezdesý barysynda. CNN málimetteri boıynsha, Tramp pen Sı Tszınpın resmı kezdesýge deıin de sóılesip úlgergen. Ol týraly Tramp senbi kúngi resmı tańǵy as ústinde aıtty.

«Biz keshe keshke júzdesip, kóp kelisimge qol jetkizdik. Qytaımen qarym-qatynasymyz óte jaqsy. Bir mámilege kele alamyz ba, joq pa, ony ýaqyt kórsetedi», - dedi ol.

Aıta ketý kerek, Osakadaǵy kezdesýdi eki el basshylary da mamyrdaǵy saýda kelisimderi sátsiz aıaqtalǵannan beri asyǵa kútip júrgen bolatyn. Al sarapshylar Osaka kezdesýinen ortaq mámile de, jańa tarıfter de kútýge bolatynyn eskertken.

Eske salsaq, Japonııada G20 sammıti ótip jatqany týraly buǵan deıin habarlaǵan bolatynbyz.