Qytaı megapolısinde gaz jarylyp, 20-dan astam adam zardap shekti

BEIJІŃ. QazAqparat – Qytaıdyń soltústiginde Tıantszın qalasynda gaz jarylyp, 23 adam zardap shekti. Oqıǵa seısenbi kúni bolǵan. Bul týraly jergilikti tótenshe jaǵdaılar bıýrosy málim etti, dep habarlaıdy QazAqparat menshikti tilshisi.

Apat seısenbi kúni Tıantszın port megapolısiniń Baodı aýdanynda bolǵan. Jarylys saldarynan 23 adam túrli dárejedegi dene jaraqatyn alǵan.

Jergilikti BAQ-tyń habarlaýynsha, aýyr halde kúıik shalǵan úsh adam aýrýhanaǵa jetkizilgen. Jeńil jaraqat alǵan 15 adam dárigerlerdiń baqylaýynda. Qalǵan beseýi medıtsınalyq mekemeden shyǵaryldy.

Aldyn ala málimetterge sáıkes, apatqa zańsyz qurylys saldarynan gazdyń aǵyp ketýi sebep bolǵan.