Qytaı mánerlep jazý kartınasy aýktsıonda absolıýtti rekord ornatty
ASTANA. Jeltoqsannyń 2-si. QazAqparat - Mın áýleti dáýiriniń kezeńindegi qytaılyq mánerlep jazý jumysy Beıjińde ótken aýktsıonda quny jaǵynan rekord ornatty, dep habarlaıdy QazAqparat Reuters agenttiginiń saıtyna silteme jasap.
Sýretshi Ý Bınniń «On segiz arhat» kartınasy 169,1 mıllıon ıýanǵa (24,8 mıllıon dollarǵa) satyldy, ol aldyn-ala boljanǵan baǵadan alty ese asyp tústi.
Qytaılyq mánerlep jazý sheberleriniń shyǵarmalaryna arnalǵan, munyń aldyndaǵy ornatylǵan rekord - Tsıýı Inniń «Qyzyl jardyń buryshy» kartınasy 10,7 mıllıon dollardy quraǵan bolatyn, al sońǵy rekord odan eki ese asyp tústi. Ý Bınniń kartınasyn shanhaılyq kollektsıoner Lıý Itsıan satyp aldy. Bir kezderi «Qyzyl jardyń buryshy» 1736-1795 jyldar aralyǵynda bılik qurǵan Tsın Tsıanlýn áýletiniń ımperatoryna tıesili bolǵan edi.
«Menińshe, Qytaıdyń klassıkalyq óneri batystyq ımpressıonısteriniń jáne Pıkasso men Renýar sııaqty zamanaýı sýretshilerdiń kartınalarymen salystyrǵanda aıtarlyqtaı tómen baǵalanyp keldi», - dedi saýda-sattyqty júrgizgen Poly International aýktsıon úıiniń ókili Lı Da. Onyń aıtýynsha, «klassıkalyq qytaılyq kartınalardyń fılosofııasyn, rýhyn jáne tarıhı qundylyǵyn tek qytaılyq adam ǵana tolyq baǵalaýy múmkin».
Aýktsıonda sonymen qatar, klassıkalyq qytaılyq mánerlep jazýda rekord ornatyldy - Sýnn ımperııasynyń ýaqytynda ómir súrgen beınelep jazý sheberi Tszen Gýnniń jumysy 108,6 mıllıon ıýanǵa (15,91 mıllıon dollar) satyldy, Lı Danyń pikirinshe, aýktsıonnyń qorytyndylary qytaılyq art-rynoktyń qalpyna kelgenin kórsetedi.
