Qytaı–Qyrǵyzstan–Ózbekstan arasyn jalǵaıtyn temirjol salynbaq

BІShKEK. QazAqparat – Qytaı–Qyrǵyzstan–Ózbekstan temirjol qurylysynyń yqtımal baǵyty jaqynda Qyrǵyzstan Respýblıkasy Mınıstrler kabınetiniń jınalysynda talqylandy, dep habarlaıdy QazAqparat menshikti tilshisi Mınıstrler kabınetine silteme jasap.

Keńeste Qyrǵyzstannyń kólik jáne kommýnıkatsııa mınıstri Erkinbek Osoev «Torýgart – Makmal - Jalal-Abad» baǵyty boıynsha temir jol magıstralin salý máseleleri boıynsha aqparat usyndy.

Onyń aıtýynsha, jobanyń tıisti tehnıkalyq-ekonomıkalyq negizdemesi osy jyldyń jeltoqsan aıynda daıyn bolady.

«Qytaı – Qyrǵyzstan - Ózbekstan temirjol qurylysynyń jobasy — biz erekshe basymdyq beretin biregeı joba. Beıindi memlekettik organdar belgilengen merzimde qajetti daıyndyq jumystaryn júrgizýi qajet», - dep atap ótti Mınıstrler kabınetiniń basshysy Aqylbek Japarov.

«Qytaı-Qyrǵyzstan-Ózbekstan» temirjoly - úsh eldiń, odan ári Parsy shyǵanaǵy elderiniń, eýropalyq temirjol jelisimen baılanysty Túrkııa Respýblıkasynyń temir joldaryna jol ashýǵa arnalǵan temirjol magıstrali.