Qytaı quramasynyń qaqpasyna birinshi shaıbany soqqannan soń-aq jeńetinimizdi sezdim - A. Maltsev
ALMATY. 3 aqpan. QazAqparat /Erbol Turymbetov/ - Biz Qytaı quramasymen bolǵan oıynnyń negizgi ýaqyty teń aıaqtalady dep kútkenbiz. Alaıda, birinshi shaıbany soqqannan keıin-aq jeńetinimizge senimdi boldym.
Hokkeıden Qazaqstan qyzdar quramasynyń bas bapkeri Aleksandr Maltsev búgin Qytaı quramasymen bolǵan kezdesýden keıingi baspasóz máslıhatynda osylaı aıtty.
Bas bapkerdiń sózine qaraǵanda, qyzdar quramasynyń jeke muz alańy jetispeıdi. «Meniń fınlıandııalyq dostarym kelip, oıynymyzdy joǵary baǵalady. Olar da tolyqqandy daıyndyq úshin ózindik muz aıdynymyzdyń joqtyǵyna qynjylys bildirdi», - dedi A. Maltsev.
Onyń aıtýynsha, qyzdar quramasy endi 16-25 sáýir aralyǵynda Shveıtsarııanyń Tsıýrıh jáne Vıntertýr qalalarynda ótetin Álem chempıonatyna qatysatyn bolady.
Budan buryn habarlaǵanymyzdaı, shaıbaly hokkeıden Qazaqstannnyń qyzdar quramasy 7-Qysqy Azııa oıyndarynyń chempıony atandy.
Búgin Almatydaǵy Balýan Sholaq atyndaǵy sport saraıynda ótken sońǵy oıynynda bizdiń komanda Qytaı quramasyn 4:1 esebimen jeńdi. Bul oıynda Elena Shtelmaıster 2 márte mergendigimen kózge tússe, Zarına Tohtıeva men Lıýbov Ibragımova bir-bir goldan soqty. Osylaısha shaıbaly hokkeıden Qazaqstannyń qyzdar quramasy úshinshi márte Aq Azıadanyń chempıony atanyp otyr. 7-Qysqy Azııa oıyndary aıasynda buǵan deıingi oıyndarynda bizdiń hokkeıshi qyzdarymyz japonııalyqtardy 3:2 (býllıtten), ońtústik koreıalyqtardy 11:0 jáne soltústik koreıalyqtardy 3:0 esepterimen utqan bolatyn.
Azıada qorytyndysy boıynsha, shaıbaly hokkeıden kúmis júldeni Japonııa quramasy utyp aldy. Qola Qytaı quramasyna buıyrdy.
