Qytaı Qoıan jylyn qarsy alýda
BEIJІŃ. 2 aqpan. QazAqparat /Rýslan Súleımenov/ - Aspanasty eli búgin Aı kúntizbesi boıynsha Jańa jyl nemese Kóktem merekesin toılaı bastaıdy.
Aqpannyń 2-sinen 3-ine qaraǵan túni Qytaı Qoıan jylyn qarsy alady. Bul merekege oraı búkil el boıynsha resmı 7 kún demalys jarııalanyp otyr, biraq Aı kúntizbesi boıynsha jańajyldyq sharalar 15 kúnge sozylady jáne ony Shyraǵdandar merekesi qorytyndylaıdy.
Qytaıda 200 mıllıonnan astam adam kópten kútken Kóktem merekesine oraı dúısenbiden bastap alys saparlarǵa jolǵa shyqty. Álemdik buqaralyq aqparat quraldary bul dástúrdi «álemdegi eń úlken mıgratsııa» dep ataıdy. Qytaılyqtar bul merekeni úılerinde týǵan-týystarymen birge qarsy alýǵa tyrysady, sondyqtan da joldyń alys-jaqyndyǵyna qaramaı, úılerine attanady.
