Qytaı qorshaǵan ortany lastaıtyn kásiporyndaryn sanktsııamen qorqytty
ASTANA. QazAqparat - Qytaı bıliginiń málimetine sáıkes, QHR birde-bir qalasy ekologııalyq normalarǵa saı kelmeıdi.
Shamadan tys kómirqyshqyl gazyn shyǵaratyn qytaılyq kásiporyndarǵa jerdi paıdalaný men nesıe berýde shekteý engiziledi, delingen QHR qorshaǵan ortany qorǵaý mınıstrliginiń málimdemesinde.
Qajetti ekologııalyq saraptamasyz zaýyttar men kásiporyndar turǵyzatyn kompanııalarǵa da Qytaı bıligi osyndaı shara qoldanýdy josparlap otyr.
QHR qorshaǵan ortany qorǵaý mınıstrligi ekologııalyq standartty buzýshylarǵa jazany kúsheıtý sharalary týraly 30 mekememen, sonyń ishinde Ortalyq bankpen kelisimge keldi.
Mınıstrlik habarlamasynda aıtylǵandaı, jaqyn arada mekeme ekologııalyq zańnamalardy óreskel buzýshylardyń tizimin qurady.
Sońǵy jyldary Qytaı ekologııalyq standartty buzýshylarǵa aıyppuldy kenetten kóterip jiberdi. Biraq, aımaqtardaǵy jumys oryndarynyń negizgi kózi bolǵan iri kásiporyndardy jaýapqa tartý basty másele bolyp otyr. Ekologııa salasyndaǵy qatań standarttarǵa qaramastan, Qytaıdaǵy iri kompanııalar jaýapkershilikten sytylyp ketýde.
Qytaı úkimetiniń tapsyrysymen, eki jyl buryn júrgizilgen zertteýge sáıkes, Qytaıdyń birde-bir qalasy ekologııalyq normalarǵa saı emes. Jáne QHR úkimetiniń málimetterinshe, eldegi 70% ózen men kól qatty lastanǵan.
QHR ekonomıkasynyń jyldam ósýi ekologııadaǵy kóptegen máselelerge ákep soqty. Ekologtar Qytaı men shet elderde Qytaıdaǵy qorshaǵan orta lastanýyna halyqaralyq ınstıtýttar men kópshiliktiń nazaryn aýdarý úshin qarsylyq aktsııalaryn jıi ótkizedi.
