Qytaı koronavırýstyń jańa shtammy anyqtalǵan Ulybrıtanııamen áýe qatynasyn toqtatty

BEIJІŃ. QazAqparat - Qytaı koronavırýstyń jańa shtammynyń anyqtalýyna baılanysty Ulybrıtanııamen áýe qatynasyn toqtatty. Beısenbi kúni QHR Syrtqy ister mınıstrliginiń resmı ókili Van Venbın osyndaı málimdeme jasady, dep habarlaıdy «QazAqparat» HAA menshikti tilshisi.

«Jaqynda Ulybrıtanııa koronavırýstyń jańa shtammy anyqtalǵanyn jarııalady jáne bul jaıly Dúnıejúzilik densaýlyq saqtaý uıymyna habarlady. Ózge de kóptegen elder Ulybrıtanııamen áýe qatynasyn toqtatý, shekarany jabý boıynsha sharalar qabyldaǵanyn málimdedi», - dedi dıplomat.

«Vırýstyń mýtatsııasy men onyń yqtımal áserin eskere otyryp, adam densaýlyǵyn saqtaý maqsatynda, sondaı-aq basqa memleketterdiń tájirıbesin eskere otyryp, Qytaı Ulybrıtanııamen áýe qatynasyn toqtatady», - dep atap ótti ol.

Buǵan deıin keıbir qytaılyq áýe kompanııalar Qytaı men Ulybrıtanııa arasyndaǵy reısterdi toqtatqan bolatyn. Sonyń ishinde eń iri China Southern Airlines te bar.

Ulybrıtanııadaǵy QHR Elshiligi London men Manchesterdegi vızalyq ortalyqtaryn jaýyp tastady.

Ótken dúısenbide Gonkong pen Ulybrıtanııa arasyndaǵy áýe qatynasy da toqtatylǵan edi. Gonkongtyń densaýlyq saqtaý organdary osy aptada Ulybrıtanııadan oralǵan eki stýdenttiń Ulybrıtanııada tabylǵan koronavırýstyń jańa shtammymen aýyrǵanyn anyqtady.