Qytaı konsýldyǵy uzyn-sonar kezek týraly túsinikteme berdi
ALMATY. KAZINFORM - Qytaı konsýldyǵy aldyndaǵy vıza alýǵa kelgen adamdardyń uzyn-sonar kezegi týraly dıplomattar túsinikteme berdi, dep habarlaıdy QazAqparat tilshisi.
Jazda Almaty konsýldyǵy aldyndaǵy kezek burynǵydan da kóbeıe túsken.
Júzdegen adam vıza rásimdeý úshin birneshe saǵat ashyq aspan astynda kezek kútýge májbúr.
Konsýldyq ókilderi kezekti azaıtýǵa barynsha jaǵdaı jasap jatqanyn habarlady.
«Stýdenttik vızalardy rásimdeýge qosymsha tereze ashyldy. Sonymen qatar, qabyldaý kúnderi ýaqytsha uzartyldy. Endi qabyldaý beısenbi kúni keshke deıin jalǵasatyn bolady», - dedi dıplomattar.
Alaıda, Qytaı konsýldyǵynda kezekti jyljytqany úshin aqsha alatyn deldaldar baryn kóp adam aıtyp shaǵymdanyp júr.
QHR bas konsýldyǵy óz kezeginde shaǵymdanǵan adamdardyń aryzyna jaýap berdi.
Aryzdanýshylarǵa jaýap qytaı jáne orys tilderinde habarlandyrý taqtasyna ilindi.
«Bas konsýldyqtyń qyzmetkerleri kezekke qatysty qarjy jınaýǵa quqyly emes. Eger sizderden bireý aqsha surasa, ony aıǵaqtaıtyn dálelińizdi konsýldyq bólimge kórsetýińiz kerek», - delingen habarlamada.
Qytaılyq dıplomattar Qytaıda oqıtyn qazaq stýdentterine qujattaryn ýaqytynda tapsyrýdy ótindi.
