Qytaı Kompartııasynyń ókilderi Qazaqstanǵa óz ıdeıalaryn tanystyrdy
Jýrnalıstermen áńgimelesken Búkilqytaı halyq ókilderi quryltaıy Turaqty komıteti bas hatshysynyń orynbasary Shen Hýnıao Kommýnıstik partııanyń jumysy týraly aıtyp berdi.
«Qytaıdyń Kompartııasy shet elderdegi partııalyq áriptesterimen yntymaqtastyq ornatqan. Bul joly «Nur Otan» partııasynyń shaqyrýymen Qazaqstanǵa keldik. Maqsatymyz - «nurotandyq» áriptesterimizge Qytaı Kompartııasy 6 plenýymynyń qorytyndysyn, ózimizdiń jańa ıdeıalarymyzdy jetkizý», - dedi Shen Hýnıao.
Sh.Hýnıaonyń aıtýynsha, Qytaı Kompartııasynyń jumysynda shet elderdi aralaý «salty» burynnan bar.
«Árbir plenýmyzdan keıin partııa dostar elderge delegatsııa jiberip, jumysymyzben tanystyryp qaıtady. Partııa saıasatyn ashyq aıtý arqyly Qazaqstan men Qytaı arasyndaǵy yntymaqtastyqty nyǵaıtyp, dostyqty kúsheıte alamyz»,-deıdi ol.
Qytaı delegatsııasynyń sapary aıasynda olar Qazaqstannyń saıası partııa ókilderimen, BAQ ókilderimen kezdesedi dep josparlanǵan.
«Qazaqstanmen aradaǵy múddeli taqyryptar boıynsha ózara pikir almasý biz úshin únemi úlken mártebe bolǵan. Qazaqstannan keıin, Tájikstan eline baryp, osyndaı biraz shara ótkizbekpiz»,-dep habarlady Shen Hýnıao.
