Qytaı kompanııasy SQO-da iri óndiris keshenin salmaq
PETROPAVL. QazAqparat - Qytaıdyń Tielin Logistics Co kompanııasy SQO-daǵy Qyzyljar aýdanynda iri óndiris keshenin salýdy josparlap otyr, dep habarlaıdy «QazAqparat» HAA tilshisi.
Oblys ákiminiń baspasóz qyzmetiniń málimdeýinshe, ınvestorlar pestıtsıd, bakterıtsıd, gerbıtsıd, podshıpnık óndiretin zaýyt, sondaı-aq elektromobıl óndirisiniń jelisi, tsellıýloza, jem zaýyty, bıdaı óńdeý, lımon qyshqyly men glıýkozasyn jáne dekstrozasyn óndirý jobasyn iske asyrmaq. Zaýytqa 4 shaqyrymdyq temirjol tartyp, elektrostantsııa salý jospary da osynyń ishine kiredi. Joba iske asyrylǵan jaǵdaıda 1,6 myńnan astam jańa jumys orny ashylmaq.
Qazirdiń ózinde keshen qurylysyna arnalǵan jer ýchaskesi bólinip qoıǵan.
«Qytaılyq áriptester atalǵan jobany iske asyrý úshin qomaqty qarjy quıýǵa daıyn. Aqshanyń alǵashqy transhy berilip qoıdy. Qarasha aıynda Qytaıǵa jasaǵan saparymyz bul jobanyń júzege asýyna muryndyq boldy. 80 mlrd teńge ınvestıtsııa salynady. Ónimniń birqatar bóligi Qytaı jáne basqa da elderge eksporttalady», - dedi SQO ákimi Qumar Aqsaqalov.
Aımaq basshysy jaýapty oryndarǵa ekologııa máselesine aıyryqsha kóńil bólý týraly tapsyrma berdi.
