Qytaı kompanııasy Qazaqstannyń dárilik shópterinen medıtsınalyq ónim shyǵarmaq

ASTANA. QazAqparat - Qytaı kompanııasy Qazaqstannyń dárilik shópterinen medıtsınalyq ónim shyǵarmaq. Bul týraly búgin elordada ótken «Bir beldeý - bir jol» aıasynda densaýlyq mádenıeti men ındýstrııasy dep atalatyn forým aıasynda Infinitus kompanııasy bas dırektorynyń orynbasary Sıýe Shoýchýn aıtty, dep habarlaıdy QazAqparat tilshisi.

«4 qyrkúıek kúni kompanııamyzdyń fılıaly Qazaqstanda memlekettik tirkeýden ótti. Qazaqstanda fılalymyzdy ashqannan keıin jergilikti ınstıtýttarmen jańa ónimder ázirleý salasyndaǵy yntymaqtastyqty jolǵa qoıǵymyz keledi. Yntymaqtastyqtyń mol jańa múmkinshilikterin de tabýdy jón sanaımyz. Sonymen qatar Qazaqstan halqynyń densaýlyq saqtaý salasyndaǵy qajettilikteri jaıynda da kóp maǵlumat almaq oıymyz bar. Jańa ónimder ázirleý úshin paıdalanýǵa jaramdy jergilikti tabıǵı resýstardy da izdemekpiz. Biz úshin ǵylymı-zertteý jumystary salasyndaǵy yntymaqtastyq ta barynsha mańyzdy», - dedi Sıýe Shoýchýn QazAqparat tilshisine bergen suhbatynda.

Onyń aıtýynsha,  Qytaıdyń 5 myń jyldan asatyn dástúrli medıtsınasy bar. Qazaqstannyń da densaýlyq salasyndaǵy dástúri qalyptasqan. Sondyqtan da qytaılyq kompanııa densaýlyq salasyndaǵy qazaq mádenıetimen jan-jaqty tanysýdy jáne densaýlyq saqtaý ındýstrııasyn damytýdyń birlesen joldaryn qarastyrýdy kózdemek.

«Eki eldiń arasyndaǵy yntymaqtastyq úshin mol múmkinshilikter bar ekendigine senimim mol. Al bul densaýlyq saqtaý salasynda damytýǵa septigin tıgizeri sózsiz. Jalpy, álemdik ekonomıka damyǵan saıyn densaýlyq saqtaý máselesi de kúntártibinen túspeıtindigi belgili jaıt. Bul - jahandyq másele. Sondyqtan tabıǵı resýrsqa baı Qazaqstanmen osy baǵytta jumys isteýge nıet tanytyp otyrmyz», - dedi ol.