Qytaı kompanııasy Aqmola oblysynda saban óńdeıtin zaýyt salmaq
KÓKShETAÝ. QazAqparat - Qytaılyq kompanııa Aqmola oblysynda iri ınvestıtsııalyq jobany júzege asyrýǵa nıetti. Bul týraly qytaıdyń «Anhui Geyi Biorefineries Industrial Park Limited» ónerkásiptik kompanııasy ókilderiniń Esil aýdanyna jumys sapary barysynda aıtyldy, dep habarlaıdy «QazAqparat» HAA tilshisi óńirlik kommýnıkatsııalar qyzmetine silteme jasap.
Esil aýdany ákimi baspasóz qyzmetiniń málimeti boıynsha qytaılyq ınvestor aýdan aýmaǵyn bıologııalyq massany jáne onyń ishinde jylyna 500 myń tonna kóleminde bıdaı sabanyn óńdeıtin iri kásiporyn salýǵa áleýeti zor dep otyr. Osy maqsatta qytaılyqtar 300 mıllıon AQSh dollary kóleminde qarjy salýǵa ázir. Oǵan qosa ınvestıtsııalyq shyǵyndy tolyqtaı moınyna almaq. Kásiporynnyń iske qosylýy 500-den astam jańa jumys ornyn ashýǵa múmkindik bermek. Kásiporynnyń jobalyq qýaty jylyna 10 mıllıon tonnaǵa jýyq qatty jáne suıyq kúıdegi organıkalyq tyńaıtqyshtardy óndirýge jetedi.
Oǵan qosa, zaýytta 120 mıllıon kVt elektr qýatyn alatyn 5 myń tekshe metr metan, Eýropa jáne Qytaı eline eksportqa shyǵarýǵa bolatyn 70 tonna bıohımııalyq lıgnına (medıtsına jáne óndiris salasynda qoldanylatyn baǵaly hımııalyq shıkizat), sondaı-aq, 20 myń tonna joǵary sapaly qaǵaz nemese 200 tonna karton qaǵazben qamtamasyz etý úshin qajetti tsellıýloza óndirýge bolady.
Jobanyń artyqshylyǵy ol aýyl sharýashylyǵy shıkizatyn ekologııalyq taza jolmen qaıta óńdep, ekologııalyq taza elektr enerııasyn alý.
Jumys sapary barysynda qytaılyq delegatsııa Esil qalasyndaǵy óndiris oryndaryn aralap kórip, ózderiniń ınvestıtsııalyq jobalaryn júzege asyratyn aýdan ortalyǵynyń ınfraqurylymmen qamtamasyz etilýi, logıstıkalyq damýyna kóńilderi toldy.
