Qytaı kómir daǵdarysynan qaýiptenedi
ASTANA. 25 qańtar. QazAqparat - Qytaılyq bankterdi retteý komıssııasy óziniń aımaqtyq bólimshelerine kómir óndirý ónerkásibinde nesıe táýekelderin tekserýdi kúsheıtýge nusqaý berdi, dep habarlady RBK.
Ókimet oryndary defolttan qaýiptenedi. Retteýshi sondaı-aq aımaqtyq basqarmalarynan senimdi basqarý salasyndaǵy táýekelderge muqııat bolýdy talap etti. Komıssııa paıymynsha, kómir ónerkásibiniń jaı-kúıi Qytaıdyń bank sektory úshin úlken táýekelder týǵyzbaq.
Retteýshiniń bul salaǵa nazar aýdarýyna qorlardyń biriniń 3 mlrd. ıýan somasyndaǵy - bul 500 mln. dollar shamasynda - mindetterin oryndaı almaýy sebep boldy. Osy qordan aqsha alǵan kómir kompanııasy bankrrotqa ushyraǵan. Defolt senimdi basqarýdaǵy búkil naryqqa ınvestorlardyń senimin azaıtady. Bul álemdegi ekinshi iri ekonomıkanyń turaqty ósimine qaýip tóndirýde. Taldamashylar naryq Qytaıdyń kómir ónerkásibine alańdaýshylyǵyn týdyryp otyrǵanyn atap ótýde, óıtkeni ol el ekonomıkasynyń negizgi salalarynyń biri jáne bank osy sektor kompanııalaryna biraz qaryz bergen. Ótken jyly kómir baǵasy 16 paıyzǵa tómendep, kóptegen óndirýshilerdi ónim shyǵarýdy azaıtýǵa májbúrledi. Sarapshylardyń aıtýynsha, úkimet problemaly kompanııalarǵa qarjylyq qoldaý kórsetýge asyǵar emes.
